Kompania amerikane e naftës North American Blue Energy Partners do të marrë në kontroll disa fusha nafte të Venezuelës që më parë kontrolloheshin nga disa kompani kineze dhe një firmë ruse.

Dy zyrtarë amerikanë thanë për Reuters se marrja e fushave është pjesë e marrëveshjes për prodhimin e naftës me Venezuelën, që u njoftua nga Presidenti Donald Trump.

Sipas zyrtarëve, projektet ishin ndër 14 kontratat që janë dhënë për North American Blue Energy Partners, të mbështetur nga Shtetet e Bashkuara.

Kompania tha se do të ketë kontrollin e biznesit dhe qeveria amerikane do të ketë të drejtat e 35% të aksioneve në kompani, së bashku me të drejtën preferenciale për të blerë 20% të prodhimit të kompanisë.

Shtëpia e Bardhë tha se North American Blue Energy Partners i ka dhënë gjithashtu Departamentit të Shtetit të drejtën e refuzimit të parë për të blerë 80% të mbetur të prodhimit të saj.

Reuters raporton se marrëveshja u jep kompanive amerikane një pikëmbështetje në disa nga asetet strategjikisht të rëndësishme të naftës të Venezuelës, duke zëvendësuar interesat kineze dhe ruse që kanë luajtur prej kohësh një rol të madh në sektorin e energjisë së vendit. Uashingtoni merr gjithashtu një rol të drejtpërdrejtë në përcaktimin se kush prodhon dhe shet naftën e Venezuelës.

Shtëpia e Bardhë shtoi se Shtetet e Bashkuara do të kenë gjithashtu të drejtën e vetos mbi bordin dhe drejtorët e North American Blue Energy Partners dhe kanë përcaktuar që shumica e bordit duhet të jenë shtetas amerikanë.