Ekipet e shpëtimit po kërkojnë mes rrënojave me nxitim për të shpëtuar jetë, pasi dy tërmete të fuqishme goditën Venezuelën pranë kryeqytetit, duke vrarë të paktën 235 persona dhe duke plagosur të paktën 4.300 të tjerë.

Në Karakas dhe në qytetin bregdetar pranë tij, La Guaira, dëgjoheshin njerëz që thërrisnin për ndihmë nga poshtë rrënojave të ndërtesave të shembura.

Tërmeti i parë me magnitudë 7.2 u pasua vetëm disa sekonda më vonë nga një tjetër edhe më i fuqishëm me magnitudë 7.5, sipas Shërbimit Gjeologjik të Shteteve të Bashkuara (USGS), ndërsa të dy ndodhën pranë sipërfaqes së tokës, duke e bërë shkatërrimin edhe më të madh.

Dyshohet se numri i viktimave është shumë më i lartë, ndërsa shumë njerëz kanë mbetur pa strehë ose kanë frikë të qëndrojnë në ndërtesat e dëmtuara dhe të pasigurta, duke kaluar natën në rrugë pas katastrofës.

Tërmetet goditën në  një ditë festë kombëtare në Venezuelë, çka do të thotë se më shumë njerëz ndodheshin në shtëpi sesa në një ditë të zakonshme pune.

Të dy tërmetet ishin të cekët – i pari kishte epiqendrën 20.3 kilometra nën sipërfaqen e tokës, ndërsa i dyti në një thellësi prej 10 kilometrash, sipas USGS.

Jorge Rodríguez, presidenti i Asamblesë Kombëtare të Venezuelës, njoftoi të enjten se numri i viktimave ishte rritur, pasi presidentja në detyrë e vendit, Delcy Rodríguez, shpalli gjendjen e jashtëzakonshme.

Disa vende kanë premtuar ndihmë për operacionet e shpëtimit, ndërsa Shtetet e Bashkuara kanë premtuar 150 milionë dollarë ndihmë. Ushtria amerikane po dërgon anije transporti dhe avionë për të mbështetur ekipet e kërkim-shpëtimit dhe “operacionet e ndihmës së shpejtë”, thuhet në një deklaratë./Reporteri.net/