Apeli vjen pikërisht nga ata që, të paktën në teori, do të kishin më shumë për të humbur.

Megjithatë, ata kanë zgjedhur t’i kërkojnë qeverisë britanike të rrisë taksat pikërisht mbi pasuritë më të mëdha. Mes firmëtarëve është edhe Gary Lineker, ish-sulmuesi i kombëtares angleze dhe një nga figurat më të njohura televizive të emisionit “Match of the Day”, së bashku me më shumë se 100 milionerë që banojnë në Mbretërinë e Bashkuar, përfshirë këngëtarin Brian Eno.

Mesazhi i drejtuar kryeministrit të ri britanik Andy Burnham është i qartë: “Na taksoni më shumë.”

Letra, e promovuar nga organizata Patriotic Millionaires, bashkon 120 persona të pasur të vendit, mes tyre sipërmarrës, shkrimtarë, ekonomistë dhe figura të botës së artit e spektaklit.

“Jemi krenarë që paguajmë taksa dhe që vazhdojmë të jetojmë këtu”, thuhet në dokument.

“Nuk kërkojmë rritje taksash për njerëzit që ngrihen çdo mëngjes për të punuar dhe për të siguruar jetesën, por për ata të ardhurat e të cilëve vijnë nga pasuria që zotërojnë.”

Përkrah Lineker shfaqen emra të njohur si Ian Gregg, ish-president i zinxhirit ushqimor Greggs, regjisori Richard Curtis, autor i filmave si Love Actually dhe Notting Hill, shkrimtarja Val McDermid, ish-traderi i City-t Gary Stevenson dhe eksperti i klimës Michael Berners-Lee.

“Vendi ynë i mrekullueshëm meriton mbështetjen e të gjithëve ne”, deklaroi Lineker. “Jam krenar që qëndroj përkrah njerëzve në të gjithë Mbretërinë e Bashkuar që dëshirojnë të jetojnë në një shoqëri më të drejtë.”

Sipas ish-futbollistit, kontributi përmes taksave është pjesë e identitetit britanik, por sot barra fiskale bie kryesisht mbi njerëzit e zakonshëm: “Më të pasurit mund të bëjnë më shumë dhe shumica e tyre e dëshiron këtë.”

Propozimi i mbështetur nga Patriotic Millionaires parashikon forma të ndryshme të taksimit të pasurisë. Një nga hipotezat është vendosja e një takse prej 2% mbi pasuritë që kalojnë 10 milionë paund, e cila sipas grupit mund t’i sillte buxhetit publik rreth 24 miliardë paund në vit. Numri i personave të prekur do të ishte shumë i kufizuar: më pak se 0,04% e popullsisë britanike, rreth 20 mijë persona sipas Tax Justice UK.

Një analizë e mëparshme kishte vlerësuar gjithashtu se një taksë mbi 350 familjet më të pasura të vendit, përfshirë 156 miliarderë, mund të gjeneronte deri në 15 miliardë paund.

Sipas mbështetësve të kësaj mase, këto të ardhura mund të përdoren për financimin e shërbimeve publike. Sipas përllogaritjeve të cituara nga organizatorët, një taksë mbi pasurinë mund të mbulonte më shumë se një të tretën e buxhetit vjetor të shkollave angleze, të ndihmonte në zgjerimin e vakteve falas në shkolla për të gjithë nxënësit dhe të kontribuonte në zgjidhjen e problemeve me kufizimet e ndihmave për strehim. Ajo mund të ndihmonte gjithashtu në ngushtimin e hendekut të financimit për shpenzimet e mbrojtjes.

Burnham, përpara se të hynte në Downing Street, nuk e kishte përjashtuar vendosjen e një takse mbi pasurinë gjatë një interviste pikërisht me Lineker. Megjithatë, ai kishte theksuar se nuk dëshironte të nxiste ndarje sociale dhe as të paraqitej si një lider që synon të godasë një grup të caktuar.

Debati vazhdon edhe brenda Partisë Laburiste. Wes Streeting, sot ministër i Mbrojtjes, kishte deklaruar më parë se barazimi i taksës mbi fitimet kapitale me atë mbi të ardhurat mund të ishte një “taksë efektive mbi pasurinë”. Në të kundërt, Jonathan Reynolds, ministër i Tregtisë, e kishte kundërshtuar idenë duke e quajtur “absurde”, duke argumentuar se qeveria tashmë e kishte rritur kontributin e të pasurve përmes masave të tjera, nga taksat mbi avionët privatë deri te ndryshimet në taksën e trashëgimisë.

Kundërshtarët e taksës mbi pasurinë argumentojnë se një masë e tillë mund t’i shtynte njerëzit me pasuri të mëdha të largoheshin nga Mbretëria e Bashkuar. Por mbështetësit e reformës paraqesin të dhëna të tjera: një studim i porositur nga Patriotic Millionaires dhe i realizuar nga Survation tregon se 75% e milionerëve do të ishin të gatshëm të paguanin më shumë taksa për të mbrojtur sistemin social, ekonomik dhe kulturor të vendit.