Kryeministri izraelit Benjamin Netanyahu thotë se hetimet sugjerojnë se burri që goditi me thikë bashkë-pilotin e tij dhe u përpoq të merrte kontrollin e një fluturimi nga Dubai në Tel Aviv, kishte kaluar përmes një “indoktrinimi radikal islamist”, raporton BBC

Avioni i kompanisë “Flydubai” humbi papritur lartësi me më shumë se 5.200 metra (17.000 këmbë) dy orë pas nisjes së udhëtimit të mërkurën, përpara se pasagjerët dhe ekuipazhi ta neutralizonin sulmuesin dhe të rimerrnin kontrollin për të bërë një ulje të sigurt.

Duke folur për “Fox News”, Netanyahu tha gjithashtu se dukej “shumë e mundshme” që sulmuesi – i cili sipas tij ishte shtetas i Omanit – “kishte ndërmend ta rrëzonte avionin”.

Ndërkohë, agjencia shtetërore e lajmeve e Emirateve të Bashkuara Arabe (EBA) raporton se atje kanë nisur hetimet për të përcaktuar “nëse incidenti ishte i lidhur me ndonjë aktivitet apo qëllim terrorist”.

Bashkë-piloti po merret aktualisht në pyetje në Arabinë Saudite, ku avioni bëri një ulje emergjente. Megjithatë, zyrtarët e EBA-s thonë se ata kanë juridiksion mbi incidentin, pasi avioni ku ndodhi sulmi është i regjistruar atje dhe fluturon nën flamurin e atij vendi.

Netanyahu i tha “Fox”-it se pasi sulmuesi u neutralizua dhe u lidh nga pasagjerët dhe ekuipazhi, ai “u bërtiste anëtarëve të ekuipazhit ‘më vrisni, më vrisni’, ndaj është e qartë se kishte prirje vetëvrasëse; kjo nuk vihet në dyshim”.

“Dhe duke pasur parasysh të gjithë pasagjerët aty, si dhe nëse e lidhni këtë me atë që sapo ju thashë për prirjet islamiste – atë radikalizim që u gjet në të kaluarën e tij – mendoj se… kjo do të na japë një të dhënë mjaft të mirë; megjithatë, nuk po nxjerr ende përfundime përfundimtare, por këto janë indikacionet që kemi tani.”