Opozita e qendrës së majtë në Suedi ka marrë një epërsi të ngushtë ndaj bllokut të djathtë në zgjedhjet parlamentare, duke hapur mundësinë e rikthimit në pushtet të ish-kryeministres Magdalena Andersson.

Me rreth 94 për qind të qarqeve të numëruara, katër partitë e qendrës së majtë kanë siguruar 176 mandate në parlamentin suedez, Riksdag, ndërsa partitë e qendrës së djathtë kanë 173 mandate.

Socialdemokratët e Andersson mbeten partia më e madhe, me rreth 28.1 për qind të votave dhe 100 mandate. Megjithatë, ky është rezultati i tyre më i dobët në më shumë se një shekull.

Një nga ndryshimet më të dukshme në këto zgjedhje është rënia e mbështetjes për Demokratët e Suedisë, parti e krahut të djathtë. Ajo mori rreth 17.6 për qind të votave dhe humbi 11 mandate, duke zbritur në 62 vende, raportojnë mediat.

Ndërkohë, partia e kryeministrit aktual, Ulf Kristersson, Moderatët, siguroi rreth 19.9 për qind të votave dhe 70 mandate, duke kaluar Demokratët e Suedisë dhe duke u bërë partia e dytë më e madhe.

Rezultati përfundimtar ende nuk është përcaktuar, pasi votat nga jashtë vendit dhe një pjesë e votave me postë pritet të numërohen të mërkurën.

Andersson u ka thënë mbështetësve të saj se duhet pritur rezultati përfundimtar, por ka theksuar se për momentin blloku i saj është në epërsi.

Formimi i një qeverie të re mund të jetë i ndërlikuar, pasi partitë e qendrës së majtë kanë dallime për çështje të tilla si emigracioni dhe taksat.

Kristersson, ndërkohë, nuk e ka pranuar humbjen dhe ka deklaruar se do të shqyrtojë mundësitë për formimin e një shumice parlamentare pasi të përfundojë numërimi i votave.

Në rast të konfirmimit të rezultateve, zgjedhjet mund t’i hapin rrugën rikthimit të Socialdemokratëve në qeveri pas katër vitesh të udhëheqjes nga e djathta.