Gjykata Supreme e Shteteve të Bashkuara ka refuzuar kërkesën për ndalimin e ekzekutimit të Christa Pike, e dënuar me vdekje në Tennessee për vrasjen e 19-vjeçares Colleen Slemmer.

Pike, 50 vjeçe, pritet të ekzekutohet të mërkurën me injeksion vdekjeprurës, pasi kërkesa e saj për falje u refuzua edhe nga guvernatori i Tennessee-t, Bill Lee, të hënën, raporton BBC.

Nëse ekzekutimi realizohet, Pike do të bëhet gruaja e parë që ekzekutohet në Tennessee pas më shumë se dy shekujsh.

Krimi ndodhi në vitin 1995, kur Pike ishte 18 vjeçe. Sipas vendimit të gjykatës, ajo dhe i dashuri i saj i atëhershëm rrahën, torturuan dhe vranë Slemmer, e cila ishte 19 vjeçe. Të dyja të rejat ndodheshin në të njëjtin kamp trajnimi për të rinj me probleme.

Avokatët e Pike kanë kundërshtuar dënimin me vdekje, duke argumentuar se ajo ishte vetëm 18 vjeçe në kohën e krimit dhe se zhvillimi i trurit në atë moshë nuk është i njëjtë me atë të një të rrituri më të madh.

Pike ndodhet në burgun e të dënuarve me vdekje që nga viti 1996.

Sipas të dhënave të cituara nga mediat amerikane, që nga vitet 1970 në Shtetet e Bashkuara janë ekzekutuar 18 gra, krahasuar me 1,663 burra.