Mbi 37 mijë e 500 emigrantë janë kthyer në Marok pasi arritën të hynin në enklavën spanjolle të Ceutas, në një prej krizave më të mëdha migratore të kohëve të fundit në kufirin mes Afrikës dhe Evropës.

Shifra është bërë publike nga Ministria e Brendshme e Spanjës, e cila njoftoi se autoritetet marokene kanë pranuar kthimin e mijëra personave që kaluan ilegalisht kufirin drejt territorit spanjoll.

Ministri i Brendshëm i Marokut, Abdelouafi Laftit, i ka garantuar Madridit se vendi i tij do të marrë mbrapsht të gjithë personat që kanë hyrë në mënyrë të paligjshme në Ceuta.

“Do t’i marrim të gjithë, pa asnjë përjashtim”, mësohet të ketë deklaruar Laftit gjatë komunikimeve me qeverinë spanjolle.

Ministri i Brendshëm i Spanjës, Fernando Grande-Marlaska, tha se të dy vendet janë angazhuar për zbatimin e masave që do të mundësojnë kthimin sa më të shpejtë të migrantëve.

Kriza në Ceuta u shoqërua edhe me një bilanc tragjik. Të paktën 57 persona kanë humbur jetën në det, ndërsa përpjekjet e kërkimit vijojnë në ujërat pranë kufirit. Shumica e viktimave dyshohet se janë mbytur gjatë përpjekjeve për të kaluar me not barrierën detare të El Tarajalit.

Ceuta, enklavë spanjolle në bregun verior të Afrikës, mbetet një nga pikat kryesore të kalimit për migrantët që synojnë të hyjnë në Bashkimin Evropian.