Drejtori i FBI-së, Kash Patel, ka njoftuar se agjencia ka nisur një hetim për një rritje të aktivitetit të dhunshëm ndaj kompanisë “Tesla”. Sipas Patelit, FBI-ja ka ndërmarrë hapa të mëtejshëm për të hetuar këto incidente dhe e ka cilësuar si “terrorizëm të brendshëm.”

“FBI-ja ka hetuar aktivitetin e dhunshëm kundër “Teslës”. Ata që janë përgjegjës do të kapen dhe do të sillen para drejtësisë”, tha Patel, sipas Reuters.

Ky hetim vjen pas një sulmi në një vendparkim të “Tesla”-s në Las Vegas, ku një person i panjohur ua ka vënë flakën disa makinave “Tesla” me kokteje molotovi dhe ka qëlluar me armë në drejtim të makinave të ekspozuara. Presidenti Donald Trump dënoi këtë akt dhe tha se sulmuesit mund të përballen me dënime deri në 20 vjet burgim

“Tesla”, që drejtohet nga miliarderi Elon Musk, ka qenë shpesh objektiv i protestave në Shtetet e Bashkuara, për shkak të politikave të Musk lidhur me shpenzimet e qeverisë dhe largimet nga puna në disa sektorë. Hetimet për këtë incident vazhdojnë, dhe autoritetet po punojnë për të identifikuar dhe ndëshkuar personat përgjegjës.