Përshkallëzimi më i fundit në Lindjen e Mesme nisi me një sulm iranian të enjten ndaj një anijeje tregtare pranë Ngushticës së Hormuzit, të cilin presidenti amerikan Donald Trump e përshkroi si një “shkelje të pamend të marrëveshjes fillestare” për t’i dhënë fund luftës.

Më pas, ushtria amerikane kreu të premten sulme ndaj objektivave ushtarake iraniane në zonën përreth Ngushticës së Hormuzit. “Avionët amerikanë goditën depo raketash dhe dronësh iranianë, si edhe pozicione radarësh bregdetarë,” njoftoi CENTCOM.

Kjo u pasua nga njoftimi i Teheranit se kishte ndërmarrë sulme ndaj objektivave ushtarake amerikane të shtunën. Ushtria amerikane “zbuloi disa dronë”, por asnjë objektiv nuk u godit, tha një zyrtar amerikan për CNN.

Më herët të shtunën, Bahreini raportoi sulme me dronë iranianë në territorin e tij, ku ndodhet një bazë ushtarake amerikane. Ndërkohë, një cisternë nafte në Ngushticën e Hormuzit u godit nga një “predhë e paidentifikuar”, sipas Operacioneve të Tregtisë Detare të Mbretërisë së Bashkuar, të cilat thanë se anija pësoi dëmtime, por të gjithë anëtarët e ekuipazhit mbetën të palënduar./Reporteri.net/