Presidenti i Shteteve të Bashkuara, Donald Trump, ka rindezur polemikat me një deklaratë të re, lidhur me Ngushticën strategjike të Hormuzit.

Ai deklaroi se do të ishte një “ide shumë e mirë” që kjo zonë të shpallej territor i SHBA-ve. Duke folur në Zyrën Ovale, Trump u shpreh se Shtetet e Bashkuara tashmë e kontrollojnë ngushticën, një pretendim që pritet të shkaktojë reagime të forta ndërkombëtare.

Ngushtica e Hormuzit është një nga rrugët detare më të rëndësishme në botë dhe lidh Gjirin Persik me Gjirin e Omanit dhe Detin Arabik. Përmes saj transportohet një pjesë e konsiderueshme e naftës dhe gazit që furnizon tregjet ndërkombëtare, duke e bërë atë një pikë me rëndësi të jashtëzakonshme për sigurinë energjetike globale.

Çdo kërcënim ndaj lundrimit në këtë zonë mund të ndikojë drejtpërdrejt në çmimet e energjisë dhe në tregjet botërore. Deklarata e Trumpit vjen në një periudhë tensionesh të larta në Lindjen e Mesme, veçanërisht për shkak të përplasjes së vazhdueshme mes SHBA-ve dhe Iranit.

Kontrolli i Ngushticës së Hormuzit është një çështje veçanërisht e ndjeshme për Iranin, i cili ka një pozicion strategjik përgjatë kësaj rruge detare. Në këtë klimë të tensionuar, deklaratat e presidentit amerikan kanë shtuar shqetësimet për të ardhmen e sigurisë së lundrimit dhe stabilitetit në rajon.