Që nga fillimi i vjeshtës, forcat mbrojtëse të Ukrainës kanë çliruar më shumë territor sesa kanë arritur të pushtojnë rusët, njoftoi presidenti Volodymyr Zelensky në një video-mesazh, sipas agjencisë Ukrinform.
Kreu i shtetit theksoi se trupat ukrainase po mbrojnë pozicionet e tyre në fronte të tjera, në rajonet Donetsk, Kharkiv dhe Zaporizhzhia.
“Raporti nga Komandanti i Përgjithshëm i Forcave të Armatosura të Ukrainës, Mykhailo Drapaty, ishte i rëndësishëm. I falënderoj ushtarët tanë. Po shohim rezultate në vijat e frontit. Situata në Dobropillia: ne po zmbrapsim përpjekjet ruse për të sulmuar pozicionet tona atje dhe po parandalojmë infiltrimet. Nuk është e lehtë, por djemtë tanë po ia dalin,” tha ai.
Sipas tij, mbrojtësit vazhdojnë të ushtrojnë presion në vijat e frontit.
“Po shohim rezultatet e operacioneve të Forcave Ajrore dhe Korpusit të Tretë të Ushtrisë – mbrojtja jonë aktive. Trendi i këtij viti vazhdon: që nga fillimi i vjeshtës, ushtarët tanë kanë çliruar më shumë territor sesa kanë arritur të pushtojnë rusët. E njëjta gjë ka ndodhur edhe në periudha të tjera të vitit,” deklaroi presidenti.
Njëkohësisht, ai siguroi se fronti ukrainas është i fortë, transmeton KosovaPress.
“Dobropillia, Kostiantynivka, Oleksievo-Druzhkivka, Orikhiv, Novopavlivka, Novoandriivka dhe Velykomykhailivka janë nën kontrollin e Ukrainës. Gjithashtu, po mbrojmë zonat pranë Kramatorsk. Ne po i mundim rusët 20 kilometra larg Zaporizhzhia, e jo pesë kilometra, siç përpiqet dikush atje në Rusi t’i mbushë mendjen Putinit,” tha Zelensky.
Siç raporton Ukrinform, presidenti Zelensky njoftoi se SHBA-ja ka rifilluar shkëmbimin e të dhënave të inteligjencës me Ukrainën, pas një periudhe gjatë së cilës ky shkëmbim kishte qenë i pezulluar.
