Eugen Cakolli nga Instituti Demokratik i Kosovës (KDI) ka deklaruar se, ndonëse vendi është katër ditë larg afatit kushtetues për zgjedhjen e Presidentit, “gara” po zhvillohet rreth asaj se kush do të mbetet fajtor nëse vendi shkon sërish në zgjedhje, shkruan Reporteri.net.
Ai ka theksuar se Kushtetuta e ka ndërtuar procesin e zgjedhjes së Presidentit përtej shumicës së thjeshtë parlamentare, duke kërkuar kuorum dhe dy të tretat e votave në raundet e para.
Sipas tij, procedura me së paku dy kandidatë dhe 30 nënshkrime për nominim synon të sigurojë mbështetje më të gjerë politike para votimit. Cakolli ka theksuar se raundi i tretë garanton përfundimin e procesit dhe vazhdimësinë institucionale.
“Edhe pse jemi veç katër ditë larg afatit të fundit kushtetues për zgjedhjen e Presidentit, duket se sërish “gara” po zhvillohet rreth asaj se kujt do t’i mbetet faji nëse vendi shkon sërish në zgjedhje, në vend që angazhimi të përqendrohet në arritjen e një zgjidhje që i jep vendit stabilitet. Madje, kanë filluar të përmenden ide që krizat politike, të prodhuara artificialisht, t’i delegohen Gjykatës Kushtetuese, sikur ajo të ishte mekanizëm për zgjidhje politike. Në fakt, vet mënyra si Kushtetuta e ka ndërtuar zgjedhjen e Presidentit tregon se ky proces është menduar përtej votimeve të zakonshme të shumicës parlamentare. Kërkesa për kuorumin dhe votat e dy të tretave të deputetëve në raundet e para është një mekanizëm i qartë “anti-shumicë”, i projektuar për të prodhuar një President me mbështetje më të gjerë sesa shumica qeverisëse e momentit”, shkruan Cakolli në Facebook.
Ai ka sqaruar se afati kushtetues për zgjedhjen e Presidentit është 5 marsi dhe se kalimi i tij do ta vendoste vendin në situatë të mospërmbushjes së obligimit kushtetues.
Sipas tij, një situatë e tillë mund të adresohet vetëm përmes zgjedhjeve të reja të parakohshme, duke theksuar se dështimi eventual do të ishte pasojë e mungesës së vullnetit politik dhe jo e paqartësive kushtetuese.
“Procedura me së paku dy kandidatë dhe kërkesa për 30 nënshkrime për nominim e strukturojnë garën në mënyrë që të jetë nominalisht demokratike, ndërsa mbështetja politike të ndërtohet para votimit; me raundin e tretë që siguron përfundimin e procesit dhe vazhdimësinë institucionale. Ky rregull procedural synon të garantojë që presidenca nuk kthehet në një vazhdim të përplasjes së zakonshme politike. Kalimi i afatit kushtetues për zgjedhjen e Presidentit – që është 5 e jo 4 marsi – e çon vendin në situatë të mospërmbushjes së një obligimi kushtetues. Një gjendje e tillë praktikisht mund të adresohet vetëm përmes zgjedhjeve të reja të parakohshme. Sepse, nëse afatet varen nga vullneti për të nisur procedurat, atëherë ato humbin çdo kuptim. Kjo, sa për analogji, do të ishte njësoj sikur afati për konstituimin e Kuvendit të mos fillonte pa u thirrur mbledhja konstituive.
Mbi të gjitha, normat kushtetuese nuk mund të lexohen të izoluara dhe vetëm në mënyrë literale, sepse asnjë kushtetutë nuk mund të parashohë çdo situatë politike. Aq më pak që dështimi eventual i këtij procesi nuk do të jetë rezultat i ndonjë paqartësie kushtetuese, por i vullnetit politik. Apo, më saktë, i mungesës së tij për të gjetur zgjidhje”, ka shkruar ai.
/Reporteri.net/
