Ministri i Jashtëm serb Ivica Daçiq duke folur për vizitën e fundit në Amerikën Latine ku kishte lobuar te shumë shtete kundër shtetit të Kosovës ka thënë se puna e tij nuk është e lehtë.
“Udhëtova mbi një milion kilometra – më shumë se 25 herë kam vizituar atë pjesë të globit, por jo si turist … Hajde, le ta provojë dikush, nëse mendon se është e lehtë të shkosh në një vend dhe të bindësh dikë që të tërheqë njohjen”, u shpreh një një emision në Tv Pink ku foli për vizitën e fundit në Amerikën Latine, transmeton Reporteri.net.
Daçiq rrëfeu se derisa ishte në Amerikën Latine kishte marrë një mesazh nga një gazetar i cili e kishte pyetur se a po shkon atje për të kërkuar strehim ku do të ikë bashkë me Vuçiqin kur gjithçka të përfundojë. “Këto janë përralla fëmijësh, nuk janë naive, por shumë të rrezikshme … “u shpreh ai.
Ndryshe Daçiq ditë më parë kishte vizituar vendet e Amerikës Latine, Argjentinën, Uruguain, Paraguain, Guatemalën e Nikaraguan, duke thënë se ka siguruar ‘zëra të sigurt’, kundër anëtarësimit të Kosovës në Interpol. /Reporteri.net
