Prokuroria Themelore në Prishtinë ka bërë të ditur se i dyshuari për vrasjen e mbrëmshme në Hajvali është identifikuar. 

Xhemajl Nuhiu, i cili aktualisht është në arrati po kërkohet nga organet e rendit, shkruan gazeta online Reporteri.net.

Viktima është qëlluar me armë zjarri, mbrëmë rreth orës 22:00 dhe vdekja e tij është konstatuar në QKUK.

Reklamë

Prokuroria Themelore në Prishtinë,  ka thënë se mbetet e përkushtuar në zbardhjen e plotë të rrethanave të rastit dhe sjelljen para drejtësisë të autorit të kësaj vepre të rëndë penale.

“Prishtinë, 12 Gusht 2025- Prokuroria Themelore në Prishtinë, njofton opinionin publik se me datë 11.08.2025, rreth orës 22:00, një ngjarje tragjike ka ndodhur ne lagjen Hajvali të Prishtinës, ku një person M.M., është qëlluar me armë zjarri. Viktima u dërgua menjëherë në Qendrën Klinike Universitare të Kosovës, ku mjekët e konstatuan vdekjen e tij pa shenja jete.

Menjëherë pas marrjes se informatës, njësitet relevante te Policisë se Kosovës, në bashkëpunim dhe koordinim me Prokurorin e shtetit, kanë dalë në vendngjarje dhe kanë ndërmarrë të gjitha veprimet e nevojshme hetimore.

Si rezultat i veprimeve të deritanishme hetimore, është identifikuar autori i dyshuar, Xhemajl Nuhiu, i cili aktualisht është në arrati dhe po kërkohet nga organet e rendit.

Prokuroria Themelore në Prishtinë, mbeten e përkushtuar në zbardhjen e plotë të rrethanave të rastit dhe sjelljen para drejtësisë të autorit të kësaj vepre të rëndë penale”, thuhet në njoftimin e Prokurorisë.

Reklamë

Kjo është vrasja e pestë brenda dy ditësh në Kosovë.

Ditën e diel, Kosova u trondit nga një vrasje e trefishtë në qytetin e Gjilanit. Të vdekur mbeten babë e bir, argjendarë të njohur në këtë qytet, të cilët u vranë në një kafene afër objektit të komunës. Pak më vonë, vdiq edhe njëri nga të plagosurit rëndë, i cili po trajtohej në Spitalin e Gjilanit, duke e çuar bilancin në tri viktima.

Të dyshuarit për rastin, Mefail Shkodra me dy djemtë e tij, Edonisin dhe Engjullin janë akoma janë në arrati. /Reporteri.net/