×
  • Lajme
  • Lajme

    Gjashtë vjet nga marrëveshja Thaçi–Daçiq

    Reporteri
    19 Prill 2019 | 20:29

    Deputetja e Vetëvendosjes, Albulena Haxhiu, kujton se sot janë bërë gjashtë vjet prej nënshkrimit të Marrëveshjes për Asociacionin e komunave serbe mes atëherë kryeministrave Hashim Thaçit dhe Ivica Daciqit.


    Haxhiut në një postim në Facebook e ka quajtur marrëveshjen e Asociacionit si më të dëmshmen në historinë e pasluftës.

    “Kjo marrëveshje synonte të instalonte bosnjëzimin e Kosovës, me ç’rast siguronte autonomi për serbët në Kosovë. Ekonominë, sigurinë e shëndetësinë dhe arsimin, sipas kësaj marrëveshje, duhet ta kontrollonin vetëm serbët, në vendbanimet me shumicë serbe”, ka shkruar ndër të tjera deputetja e VV’së.

    Shkrimi i plotë:

    Sot gjashtë vjet është nënshkruar marrëveshja më e dëmshme në historinë e pasluftës për Republikën e Kosovës: Marrëveshja Thaçi – Daçiq, e 19 prillit 2013.

    Kjo marrëveshje synonte të instalonte bosnjëzimin e Kosovës, me ç’rast siguronte autonomi për serbët në Kosovë. Ekonominë, sigurinë e shëndetësinë dhe arsimin, sipas kësaj marrëveshje, duhet ta kontrollonin vetëm serbët, në vendbanimet me shumicë serbe.

    Fillimisht decentralizimi i ndau banimet serbe nga ato shqiptare në baza etnike, e me këtë marrëveshje u krijua mundësia për një bashkim të këtyre komunave, duke krijuar një zonë autonome me shumë kompetenca, një pushtet praktikisht të veçantë, sfidues ndaj unitetit republikan të Kosovës.

    Gjykata Kushtetuese pas kundërshtimit të fuqishëm qytetar e opozitar në Kuvend e jashtë tij e hodhi poshtë këtë marrëveshje tradhtare, e cila shkelte në 23 nene frymën e Kushtetutës, por ky projekt e projekte tjera të dëmshme vazhdojnë t’i sillen Republikës së Kosovës.

    Por krahas kërcënimeve të tilla edhe më i fuqishëm është vullneti i qytetarëve që sot sikur atëherë nuk do të lejojë as kryeministra e as presidentë që ta cënojnë sovranitetin dhe integritetin territorial të vendit.

    Shpërndaje:
    Të ngjashme
    Të ngjashme

    © Reporteri (R Media L.L.C.), 2019-2024. Të gjitha të drejtat e rezervuara.

    Linku i lajmit u kopjua!