Kryeministri Ramush Haradinaj siç duket nuk po i pëlqejnë protestat e paralajmëruara nga Lëvizja Vetëvendosje me moton kundër “PAN hajnisë”.
Ai e fton VV-në të shterojë të gjitha rrugët institucionale, të përdorë së pari interpelancat parlamentare, tryezat politike dhe debatet me ekspertët për sistemin e drejtësisë, pasi konsideron se presioni i rrugës mbi drejtësinë është precedent që nuk i kontribuon vendosjes së saj.
Shkrimi i tij i plotë në Facebook:
Kosova është një shoqëri demokratike ku liria e shprehjes dhe protestës është një e drejtë e garantuar. Protesta kundër korrupsionit, me kërkesën për dorëheqjen e bartësve të pozitave të larta në sistemin e drejtësisë, si pushtet i ndarë, është e drejtë qytetare dhe politike.
Por, presioni i rrugës mbi drejtësinë është precedent që nuk i kontribuon vendosjes së saj.
Lëvizjen Vetëvendosje, si subjekt i respektueshëm parlamentar, e ftoj të shterojë të gjitha rrugët institucionale, të përdorë së pari interpelancat parlamentare, tryezat politike dhe debatet me ekspertët për sistemin e drejtësisë. /Reporteri.net/.