Lutfi Haziri, nga Lidhja Demokratike e Kosovës, ka reaguar pas shkarkimit të Blerim Isufajt nga pozita e Kryeprokurorit të Prokurorisë Speciale të Kosovës.
Në postimin e tij, Haziri, ka thënë se ‘’republika nuk e duron mentalitetin parti-shtet’’.
‘’ Ushtari i lirisë, besimtari i shtetit të së drejtës dhe luftëtari më i madh i korrupsionit sot u ndal. Por çdo ndalje mund të jetë vetëm pika e rikthimit të madh. Kosova ka nevojë për besë e shpresë, e jo për shkarkime të njerëzve më të mirë e autoritativë që kishte sistemi i drejtësisë’’, ka shkruar ai.
Postimi:
Republika nuk e duron mentalitetin parti-shtet!
Kjo qasje filloi para 6 vitesh me shkarkimin e gjyqtares Valdete Daka nga KQZ-ja, vazhdoi me bordet e ndërmarrjeve, komisionet e pavarura, Këshillin Gjyqësor të Kosovës, ambasadorët dhe konsujt, e deri te Agjencia e Kosovës për Inteligjencë.
Dhe sot, në vazhdën e kësaj qasjeje, pikërisht kur pritej të dilte zgjidhja për një President konsensual, vjen lajmi për shkarkimin e Kryeprokurorit Blerim Isufaj.
Ushtari i lirisë, besimtari i shtetit të së drejtës dhe luftëtari më i madh i korrupsionit sot u ndal. Por çdo ndalje mund të jetë vetëm pika e rikthimit të madh. Kosova ka nevojë për besë e shpresë, e jo për shkarkime të njerëzve më të mirë e autoritativë që kishte sistemi i drejtësisë.
Kryetari i Aleancës, Ardian Gjini, ka reaguar pas vendimit të Këshillit Prokurorial të Kosovës për shkarkimin e Blerim Isufajt nga pozita e kryeprokurorit të Prokurorisë Speciale.
Gjini e ka cilësuar shkarkimin e Isufajt si një nga veprimet më të gabuara, sipas tij, të pushtetit aktual.
“Kosova bëri edhe një hap të madh drejt totalitarizmit. Tashmë, për herë të parë që prej kohës së komunizmit, Kosova qeveriset nga një kastë me tipare të pastra të një regjimi totalitar”, ka shkruar Gjini në Facebook.
Kreu i AAK-së ka vazhduar kritikat ndaj pushtetit, duke iu referuar edhe sloganit të përdorur më herët për luftimin e korrupsionit.
“Nga slogani ‘hajnat në burg’ përfundoi te ‘hajnat nën mburojën e pushtetit’”, ka shkruar ai.
Gjini është shprehur se Kosova ka njerëz të ditur dhe patriotë dhe se, sipas tij, qytetarët do ta rikthejnë qeverisjen demokratike dhe sundimin e ligjit.
“Kosova ka mjaftueshëm njerëz të ditur dhe patriotë. Populli i Kosovës do ta rikthejë qeverisjen demokratike e të përgjegjshme dhe do ta rivendosë sundimin e ligjit. Por kjo duhet të ndodhë shpejt. Koston e kësaj mënyre të qeverisjes për një kohë do ta paguajnë qytetarët tanë”, ka deklaruar Gjini.
Në fund të reagimit, ai ka përdorur tone të ashpra ndaj pushtetit.
“Por kjo kastë do të përfundojë keq, pashmangshëm”, ka përfunduar Gjini.
Ish-kryetari i Aleancës, Ramush Haradinaj, ka reaguar pas shkarkimit të kryeprokurorit të Prokurorisë Speciale, Blerim Isufaj, duke e cilësuar këtë vendim si “hakmarrje të pastër politike”.
Haradinaj ka thënë se shkarkimi i Isufajt “po kundërmon keq”, duke e lidhur atë edhe me kritikat që, sipas tij, kryeministri Albin Kurti kishte bërë ndaj kryeprokurorit në Kuvend.
“Po i vjen erë e keqe shkarkimit të kryeprokurorit Blerim Isufaj. Kjo erë ka kundërmuar keq në ditën kur kryeministri e sulmonte kryeprokurorin në foltoren e Parlamentit dhe mbronte të akuzuarit për korrupsion”, ka shkruar Haradinaj.
Ai ka deklaruar se askush nuk duhet t’i ikë drejtësisë, duke paralajmëruar se, sipas tij, ata që “mbrohen përmes shkarkimeve” do të përballen me ligjin.
“Askush nuk do të mund t’i ikë drejtësisë. Do të vijë dita që këta që mbrohen përmes shkarkimeve do të përballen me forcën e ligjit”, ka shkruar ai.
Haradinaj e ka cilësuar shkarkimin e Isufajt si të kundërt me parimin e sundimit të ligjit.
“Ky nuk është sundim i ligjit, por hakmarrje e pastër politike ndaj kujtdo që guxon të mbrojë pavarësinë e institucioneve”, ka deklaruar ai.
Në fund, Haradinaj ka thënë se Kosova nuk duhet të lejojë që lufta kundër korrupsionit të ndikohet nga politika.
“Kosova nuk do të lejojë që lufta kundër korrupsionit të diktohet nga zyrat e politikës dritëshkurtër!”, ka shkruar Haradinaj.
Pas shkarkimit të Blerim Isufajt nga pozita e kryeprokurorit të Prokurorisë Speciale, Këshilli Prokurorial i Kosovës ka caktuar Dren Pacën ushtrues detyre të Kryeprokurorit të Prokurorisë Speciale të Republikës së Kosovës.
Paca do ta ushtrojë këtë detyrë pas vendimit të KPK-së për shkarkimin e Isufajt, i cili u mor me gjashtë vota për dhe një kundër.
Vendimi për shkarkimin e Isufajt u mor sot, pas një takimi të jashtëzakonshëm të KPK-së, në të cilin u diskutua performanca e tij në krye të Prokurorisë Speciale.
Para mbledhjes, Instituti i Kosovës për Drejtësi (IKD) kishte kërkuar nga KPK-ja që të mos merrte vendime të ngutshme dhe kishte bërë thirrje për një proces të drejtë, profesional dhe të pavarur.
IKD kishte theksuar se llogaridhënia nuk duhet të përdoret si arsyetim për vendimmarrje me procedura të shpejta dhe të paqarta, duke nënvizuar rëndësinë e funksionalitetit të PSRK-së, e cila trajton raste të krimit të organizuar dhe krimit transnacional.
Instituti kishte rikujtuar edhe rastin e Besim Kelmendit, duke thënë se në fund të vitit 2025 KPK kishte marrë vendim për shkarkimin e tij nga pozita e ushtruesit të detyrës së Kryeprokurorit të Shtetit, ndërsa Gjykata Supreme e kishte anuluar atë vendim në dhjetor të të njëjtit vit.
IKD kishte kërkuar që çdo vendim që prek pozitën e një kryeprokurori të jetë në përputhje me Kushtetutën, ligjin dhe praktikën gjyqësore, ndërsa vlerësimi i performancës të jetë objektiv dhe i bazuar në indikatorë të matshëm.
Këshilli Prokurorial i Kosovës (KPK) ka shkarkuar Blerim Isufajn nga pozita e Kryeprokurorit të Prokurorisë Speciale të Republikës së Kosovës.
Vendimi është marrë në takimin e jashtëzakonshëm të mbajtur më 2 tetor 2026, ndërsa KPK ka bërë të ditur se Isufaj do të vazhdojë të ushtrojë funksionin e prokurorit në Prokurorinë Speciale.
Sipas KPK-së, vendimi është marrë në bazë të nenit 22, paragrafit 5 të Ligjit për Këshillin Prokurorial të Kosovës, mbi bazën e rrethanave të konstatuara dhe të dokumentuara gjatë procedurës përkatëse.
KPK ka listuar disa prej arsyeve që, sipas tij, kanë çuar në largimin e Isufajt nga pozita e kryeprokurorit.
Në mesin e tyre janë keqmenaxhimi i Prokurorisë Speciale, jokompetenca në ushtrimin e funksionit të kryeprokurorit, dështimi në përmbushjen e detyrave dhe përgjegjësive ligjore, si dhe mospërmbushja e standardeve të kërkuara të performancës.
KPK thotë se këto të fundit janë konstatuar përmes vlerësimit të performancës, të realizuar në pajtim me dispozitat ligjore dhe aktet përkatëse nënligjore.
“Këto nuk përbëjnë vlerësime të përgjithshme apo konsiderata politike, por rrethana të lidhura drejtpërdrejtë me ushtrimin e funksionit, përgjegjësitë ligjore të bartësit të tij dhe standardet profesionale e institucionale të kërkuara për drejtimin e Prokurorisë Speciale”, thuhet në komunikatën e KPK-së.
Sipas KPK-së, secila prej këtyre rrethanave, veçmas dhe në mënyrë të pavarur, përbën bazë për largimin e Isufajt nga pozita.
Pas largimit të Isufajt, KPK ka caktuar prokurorin Dren Paca ushtrues detyre të Kryeprokurorit të Prokurorisë Speciale.
Paca do ta ushtrojë këtë funksion deri në plotësimin e pozitës, në përputhje me procedurat dhe kompetencat e përcaktuara me legjislacionin në fuqi.
KPK ka thënë se caktimi i ushtruesit të detyrës synon të sigurojë vazhdimësinë e funksionimit të PSRK-së dhe trajtimin e pandërprerë të rasteve penale.
KPK kritikon gjendjen e PSRK-së
Në komunikatën e saj, KPK ka shprehur shqetësim edhe për gjendjen e efikasitetit institucional të Prokurorisë Speciale.
Sipas KPK-së, mënyra e menaxhimit të kësaj prokurorie, veçanërisht gjatë katër viteve të fundit, ka ndikuar në dobësimin e efikasitetit dhe rezultateve institucionale.
Këshilli thotë se drejtimi i PSRK-së nuk mund të kufizohet vetëm në ushtrimin formal të kompetencave administrative, pasi kryeprokurori bart përgjegjësi për organizimin, menaxhimin, funksionalitetin dhe rezultatet e institucionit.
KPK ka bërë të ditur se do t’i kushtojë vëmendje të veçantë forcimit të kapaciteteve dhe rezultateve në luftimin e krimit të organizuar dhe transnacional, përfshirë kontrabandimin e migrantëve, trafikimin e narkotikëve, trafikimin e qenieve njerëzore, pastrimin e parave dhe veprimtarinë e organizatave kriminale që veprojnë përtej kufijve.
Këshilli ka deklaruar se do të ndërmarrë veprimet e nevojshme për rikthimin e efikasitetit dhe përmirësimin e rezultateve të Prokurorisë Speciale.
Instituti i Kosovës për Drejtësi (IKD) ka pranuar me shqetësim informacionin se Këshilli Prokurorial i Kosovës (KPK) ka thirrur për sot, takim të jashtëzakonshëm, me pikë të rendit të ditës diskutimin lidhur me performancën e Kryeprokurorit të Prokurorisë Speciale të Republikës së Kosovës (PSRK).
IKD thekson qartë se llogaridhënia nuk duhet dhe nuk mund të përdoret si arsyetim për vendimmarrje me procedura të shpejta dhe të paqarta ndaj një kryeprokurori, me theks të veçantë në kohën kur kjo prokurori është duke trajtuar lëndë që ndërlidhen edhe me luftën kundër krimit të organizuar dhe krimit transnacional dhe në bashkëpunim me shtetet mike të Republikës së Kosovës.
IKD rikujton se reformat në sistemin prokurorial duhet të promovojnë besimin e publikut në këtë sistem dhe të garantojnë pavarësinë e këtij sistemi nga çfarëdo perceptimi për ushtrim të ndikimit politik në sistemin prokurorial.
“KPK, para se të ndërmarrë çfarëdo veprimi lidhur me Kryeprokurorin e PSRK-së, duhet të marrë për bazë faktin se tanimë kemi një precedent serioz që ndërlidhet me vendimmarrje të shpejtë dhe të pabazuar nga ana e KPK-së, e që do të duhej të shërbejë si mësim institucional. Në fund të vitit 2025, KPK kishte shkarkuar Besim Kelmendin nga pozita e ushtruesit të detyrës së Kryeprokurorit të Shtetit përmes një procedure të shpejtë dhe të kontestuar. Në dhjetor 2025, vetë Gjykata Supreme e anuloi këtë vendim si të kundërligjshëm. KPK duhet të marrë mësime nga rasti në fjalë dhe të shmangë përsëritjen e praktikave të vendimmarrjes së ngutshme”.
IKD rithekson se çdo proces i vendimmarrjes që mund të prekë pozitën apo mandatin e një kryeprokurori të një prokurorie të caktuar duhet të jetë në pajtim me Kushtetutën, ligjin e aplikueshëm dhe praktikën gjyqësore. Për më tepër, çdo vendimmarrje duhet të marrë për bazë specifikat dhe mandatin e PSRK-së, andaj çdo vlerësim i performancës së Kryeprokurorit të PSRK-së duhet të jetë profesional, i drejtë, i paanshëm, objektiv dhe i bazuar në indikatorë të matshëm, duke respektuar njëkohësisht pavarësinë e prokurorëve në trajtimin e rasteve individuale.
“Kërkesa për llogaridhënie nuk duhet të përdoret si instrument apo mënyrë për ndërhyrje në pavarësinë funksionale të një zyre prokuroriale, sikurse pavarësia nuk mund të shfrytëzohet si arsyetim për mungesë të llogaridhënies. Këto dy standarde duhet të zbatohen në praktikë në mënyrë të drejtë, transparente dhe të balancuar”.
IKD nuk e kupton urgjencën e një takimi të tillë pa përfunduar dhe pa u shterur të gjitha mjetet juridike në dispozicion.
Andaj, IKD kërkon nga KPK-ja që të sigurojë proces të drejtë dhe të pavarur, të mos marrë asnjë veprim i cili do të cenonte parimet e sigurisë juridike, funksionalitetin e PSRK-së dhe, më e rëndësishmja, besimin në KPK dhe perceptimin për pavarësinë e sistemit prokurorial.
Reporteri.net është gazetë online e lajmeve nga vendi dhe bota. Qëllim kryesor ka informimin e drejtë, të paanshëm dhe të shpejtë. Reporteri.net, në pronësi të “R Media L.L.C.”, është themeluar në mars të vitit 2019 dhe drejtohet nga gazetarët Bekim Kabashi dhe Mentor Gjergjaj.
E-Mail: info@reporteri.net
Marketing: marketing@reporteri.net
Adresa: Rr. UÇK, Nr. 102/11 10000 Prishtinë, Kosovë
