Inspektori i ndërtimit në Komunën e Prishtinës, Gafurr Rexha që u arrestua sot nga Policia e Kosovës pasi u zu në flagrancë duke i marrë 12 mijë euro nga pronari i një kompanie ndërtimit, ishte arrestuar edhe një vit më parë për të njëjtën vepër, shkruan Reporteri.net.

Ai një vit më parë ishte arrestuar bashkë me dy kolegë të tij Qenan L. Osmani dhe Gjymshit A. Gashi, nën dyshimin për shpërdorim të detyrës zyrtare, shkruan Reporteri.net.

Ata dyshoheshin për rastin shpërdorim i detyrës zyrtare në rrugën “Nekibe Kelmendi” në fshatin Hajvali, ku kishte ndodhur një rast “shkaktim i rrezikut të përgjithshëm dhe dëmtim i pronës”.

“Reporteri.net” raportoi sonte se Policia e Kosovës serish sot ka arrestuar inspektorin e ndërtimit në Komunën e Prishtinës, Gafurr Rexha. Ai është zënë në flagrancë me 12 mijë euro në çantë të cilat ia kishte kërkuar Naim Berishës, pronar i kompanisë së ndërtimit “Berisha Group.

Burime të Gazetës Online “Reporteri.net” bëjnë me dije se ngjarja ka ndodhur sot rreth orës 17 në restorantin “Liburnia” në Prishtinë.

“Rreth orës 17:00, I dyshuari G.R inspektor i ndërtimit ishte duke e pritur viktimën në restorantin ‘Liburnia’ në Prishtinës dhe menjëherë pas takimit i nënti pranon paratë që ka kërkuar në formë ryshfeti ne vlerë prej 12 mijë euro të cilat I futë në çantën e tij të punës. Pas i dyshuari konsumoi veprat penale të korrupsionit u arrestua në flagrancë nga hetuesit. I dyshuari u detyra ta hapte çantën në prezencë të forenizikës në të cilin ishte zarfi me paratë që viktima N.B I kishe dhënë të dyshuarit G. R në formë ryshfeti” ka bërë të ditur ky burim i Reporterit.

Gafurr Rexha është dërguar në mbajtje për 48 orë. Ai dyshohet për veprat “Keqpërdorim i detyrës apo autoritetit zyrtar” dhe “Marrje e ryshfetit”.

Arrestohet inspektori i ndërtimit në Prishtinë, u kap në restorant duke i marrë 12 mijë euro ryshfet

Por si ndodhi ngjarja dhe si nisën hetimet?

Mësohet se fillimisht viktima Naim Berisha kishte ankuar në polici se ndonëse posedonte leje ndërtimi për një objekt në lagjen e Spitalit në Prishtinë, atij i ishte ndaluar puna nga inspektori i cili po kërkonte ryshfet prej 12 mijë eurosh, shkruan Reporteri.net.

“Drejtoria për Hetimin e Krimeve Ekonomike dhe korrupsionit ka pranuar palën ankuese N.B i cili ka deklaruar se është pronar i një firme ndërtimi “Berisha group” e cila merret me ndërtime të larta. Ankuesi tregon se është duke ndërtuar një objekt në lagjen e Spitali dhe se edhe përkundër faktit që posedon leje ndërtimi ju kanë ndaluar punimet nga Inspektori i ndërtimit të Komunës së Prishtinës dhe sipas tij ky i fundit është duke i kërkuar ryshfet në vlerë për 12 mijë euro për t’ia lejuar vazhdimin e punimeve”, ka thënë ky burim.

Pas pranimit të informatës Policia ka marrë të gjitha veprimet e nevojshme hetimore me qëllim të verifikimit të informacionit dhe ka arritur deri te arrestimi i inspektorit. /Reporteri.net/.