Qeveria e Kosovës ka zhvilluar sot në mbrëmje mbledhjen e 122-të të saj, mbledhje kjo e cila u mbajt në mënyrë elektronike.
Në këtë mbledhje, kryeministri Kurti me ministrat e tij kanë miratuar dy vendime, shkruan Gazeta Online Reporteri.net.
I pari ka të bëjë me vendimin për ndryshimin dhe plotësimin e Programit Legjislativ të Qeverisë së Republikës së Kosovës për vitin 2023, ku me propozimin e Ministrisë së Financave, Punës dhe Transfereve, në këtë program është përfshirë edhe Projektligji për ndryshimin dhe plotësimin e Ligjit Nr. 08/L- 193 mbi Ndarjet Buxhetore për këtë vit.
Ndërsa i dyti me vendimin për aprovimin e Programit për Reforma në Ekonomi përgjatë periudhës 2023-2025.
Nga ana tjetër, Gazeta Online Reporteri.net merr vesh se nesër qeveria do ta bëjë publike edhe koeficientin e pagave, që është mbajtur “sekret” deri tash.
Ligji për Pagat, i cili është dekretuar në fillim të muajit janar nga Presidentja Vjosa Osmani, pritet të hyjë në fuqi po nesër, më 1 shkurt.