Ushtria amerikane kreu sulme ndaj Iranit për të dytën ditë radhazi, disa orë pasi presidenti Donald Trump tha se një marrëveshje e përkohshme për t’i dhënë fund luftës ishte “anuluar”.
Vonë të mërkurën, mediat shtetërore iraniane raportuan shpërthime në qytetin portual Bandar Abbas, në Ngushticën e Hormuzit; në Sirik, një tjetër qytet bregdetar jugor; si dhe në provincën jugperëndimore Bushehr, ku ndodhet kompleksi i centraleve bërthamore të Iranit.
Trump shkroi në Truth Social: “Kjo është hakmarrje për bombardimin e djeshëm të anijeve nga Irani. Nëse ndodh përsëri, do të jetë shumë më keq!”
Komanda Qendrore e SHBA-së konfirmoi sulmet.
Ky është raundi i dytë i sulmeve të nisura nga SHBA-ja kundër Iranit gjatë 48 orëve të fundit.
Ushtria amerikane thotë se ka goditur 170 objektiva në të dyja valët e sulmeve.
iPërshkallëzimi i fundit zbehu shpresat për shndërrimin e memorandumit të mirëkuptimit të nënshkruar mes dy palëve më 17 qershor në një marrëveshje të përhershme për t’i dhënë fund luftës.
Pas sulmeve ndaj bazave ushtarake amerikane në Bahrein dhe Kuvajt të mërkurën, Irani i goditi ato sërish të enjten, ndërsa sirenat u aktivizuan të paktën dy herë në Bahrein, ku ndodhet selia e Flotës së 5-të të Marinës së SHBA-së.
Nuk pati menjëherë raportime për dëme. Ushtria e Kuvajtit tha se ishte duke interceptuar në mënyrë aktive dronë dhe raketa në hyrje.
Televizioni shtetëror iranian raportoi se shpërthime të tjera u dëgjuan në ishullin Abu Musa. Ishulli është një nga tre ishujt e vegjël të pretenduar nga Emiratet e Bashkuara Arabe, të cilët përbëjnë bazën e kontrollit të Iranit mbi Ngushticën e Hormuzit./Reporteri.net/
