Viktima e dhunës seksuale gjatë luftës në Kosovë, Vasfije Krasniqi-Goodman ka falënderuar të gjithë ata që e kanë përkrahur atë pas dëshmisë që dha të marten në Kongresin Amerikan.

Ajo thotë se serbët që e lënduan janë ende të lirë dhe drejtësia ka dështuar në rastin e saj.
Përkundër kësaj Krasniqi-Goodman thotë se kurrë nuk do të ndalet së thëni të vërtetën e saj dhe kurrë nuk do të ndalet së kërkuari drejtësi, shkruan Reporteri.net.

Kujtojmë se dje me ftesë të kongresistit amerikan, Eliot Engel, e mbijetuara e dhunës seksuale gjatë luftës së fundit, Vasfije Krasniqi-Goodman me lot në sy dhe duke u dridhur ka dëshmuar për krimet e Serbisë në Kosovë, para Komitetit për punë të Jashtme të Kongresit amerikan.

Postimi i plotë i Krasniqit-Goodman:

Dua t’ju falenderoj nga zemra për mesazhet e pafunda që me keni dërguar sot dhe dje.

Unë isha e nderuar që me ftesë të Kongresmenit Engel dhe Kongresmenit McCaul të jap dëshminë në Kongresin Amerikan për krimet e Serbisë gjatë luftës në Kosovë.

Unë jam një nga 20.000 gratë dhe burrat ndaj të cilëve është ushtruar terror dhe dhunë seksuale.

Ata që u munduan të më poshtërojnë dhe lëndojnë ende janë të lirë. Drejtësia ka dështuar në rastin tim. Drejtësia ka dështuar për viktimat e luftës së Kosovës.

Por unë kurrë nuk do të ndalem së thëni të vërtetën time dhe kurrë nuk do të ndalem së kërkuari drejtësi! /Reporteri.net/.