Momenti kur qytetarët ia bllokojnë rrugën eskortës së Von der Leyen

Reporteri

01 Tetor 2026 | 13:38

Eskorta e presidentes së Komisionit Evropian, Ursula von der Leyen, është detyruar të ndalojë dhe të kthehet në Lipjan, pasi rruga nëpër të cilën po kalonte është bllokuar nga qytetarë që po protestonin.

Protestuesit kanë dalë në rrugë duke brohoritur “UÇK, UÇK” dhe “Nuk kalon”, duke penguar kalimin e eskortës së zyrtares së lartë evropiane.

Për shkak të bllokimit, eskorta është detyruar të ndryshojë itinerarin dhe të vazhdojë përmes rrugëve alternative.

Von der Leyen ndodhet në Kosovë në kuadër të vizitës së saj në rajon, ndërsa gjatë qëndrimit në vend pritet të zhvillojë takime me krerët institucionalë të Kosovës.

Ursula von der Leyen pritet me protestë “Jo në emrin tim,” të rinj me pankarta i zënë udhë nga aeroporti

Reporteri

01 Tetor 2026 | 13:03

Presidentja e Komisionit Evropian, Ursula von der Leyen, me të zbritur në Prishtinë e ka gjetur veten me pritje protestuese nga qytetarë të Kosovë.

Kjo për arsye të Aktgjykimit të Dhomave të Specializuara të Kosovës ndaj drejtuesve të UÇK-së.

Qytetarë të numërt kanë dalë rrugës ku po kalonte eskorta e von der Leyen-it, me pankarta “Jo në emrin,” ndërsa janë dëgjuar edhe thirrje si “Marre.”

Gjykata Speciale financohet dhe merr mbështetjen administrative nga Politika e Përbashkët e Sigurisë dhe Mbrojtjes si trup ekzekutiv i Komisionit Evropian.

Bashkimi Evropian është mbështetës i madh i Gjykatës Speciale.

Albin Kurti, Kryeministër i Kosovës, pritet të takohet me von der Leyen, në kuadër të vizitës së saj në rajonin e Ballkanit Perëndimor.

Përveç Kurtit, ajo do të takohet edhe me Kryetaren e Kuvendit, Albulena Haxhiun.

Në Kosovë tashmë janë bërë mbi dyjavë protesta çdoditore në mbështetje të drejtuesve të UÇK-së.

Sot në ora 16:00 zhvillohet protestë e madhe e organizuar nga “Liria ka Emër” ku priten dhjetëra mijëra njerëz nga e mbarë Kosova të protestojnë në kërkim të drejtësisë për Thaçin, Veselin, Krasniqin dhe Selimin.

Ata u dënuan me 81 vite burgim në shkallë të parë nga Dhomat e Specializuara./Nacionale

Von der Leyen sot në Kosovë, pritet të takohet me Haxhiun e Kurtin

Reporteri

01 Tetor 2026 | 8:06

Pas qëndrimit në Shqipëri, presidentja e Komisionit Evropian, Ursula von der Leyen, do ta vizitojë nesër, sot Kosovën, në kuadër të turneut të saj të gjashtë në Ballkanin Perëndimor.

Gjatë qëndrimit në Prishtinë, von der Leyen do të takohet me ushtruesen e detyrës së presidentes, Albulena Haxhiu, dhe kryeministrin Albin Kurti.

Sipas njoftimit për media, takimi von der Leyen-Haxhiu do të nisë nga ora 12:30 në Kabinetin e Presidentes.

Ndërkaq, në orën 13:00, kryeministri i Republikës së Kosovës, Albin Kurti, do ta presë në takim presidenten e Komisionit Evropian, Ursula von der Leyen, në ndërtesën e Qeverisë.

Pas takimit do të mbahet konferencë për media.

Në fokus të vizitës do të jenë hapat e mëtejshëm në rrugën evropiane dhe procesi i integrimit gradual, i mbështetur edhe nga Plani i Rritjes për Ballkanin Perëndimor.

Pas vizitës në Kosovë, von der Leyen do të udhëtojë po më 1 tetor drejt Podgoricës, ndërsa turneu do të përmbyllet më 2 tetor në Shkup. Gjatë turneut ajo pritet të vizitojë edhe projekte të mbështetura financiarisht nga Bashkimi Evropian.

Gjatë vizitës së sotme në Shqipëri, presidentja e Komisionit Evropian, Ursula von der Leyen, ka thënë se anëtarësimi i Shqipërisë në Bashkimin Evropian nuk e bën vetëm Shqipërinë më të fortë, por edhe vetë BE-në.

Në konferencën e përbashkët për media në Tiranë me kryeministrin Edi Rama, ajo ka përgëzuar Shqipërinë për përparimin në rrugën drejt BE-së, por ka theksuar se ka ende punë përpara dhe se nevojiten reforma të mëtejshme në të gjithë kapitujt e hapur.

Von der Leyen ka theksuar gjithashtu se lufta kundër korrupsionit është kyçe në rrugën e anëtarësimit në BE.