Presidentja Vjosa Osmani ka dalë me deklaratë pas zgjedhjes së Dimal Bashës si Kryetar i Kuvendit, duke thënë se e mirëpret që procesi i konstituimit të Kuvendit ka filluar të zhbllokohet, shkruan Reporteri.net.

Osmani i ka uruar punë të mbarë e në interes të vendit Bashës dhe nënkryetarëve të zgjedhur të Kuvendit, Albulena Haxhiu, Vlora Çitaku, Kujtim Shala dheEmilija Redžepi, duke shtuar se shpreson që konstituimi i Kuvendit të përmbyllet sa më parë, në përputhje me Kushtetutën.

E para e vendit ka thënë se shpreson që sa më parë, e në përputhje me procedurat kushtetuese, Kuvendi të votojë edhe Qeverinë e re.

“Presidentja mirëpret që procesi i konstituimit të Kuvendit ka filluar të zhbllokohet dhe shpreson që ky proces të përmbyllet sa më parë, në përputhje me kushtetutën. Ajo i uron punë të mbarë e në interes të vendit kryetarit të ri Dimal Basha dhe nënkryetarëve të zgjedhur të Kuvendit, znj.Albulena Haxhiu, Znj.Vlora Çitaku, z.Kujtim Shala dhe znj.Emilija Redžepi. Presidentja shpreson që sa më parë, e në përputhje me procedurat kushtetuese, Kuvendi të votojë edhe Qeverinë e re të dalë nga vullneti i qytetarëve nga zgjedhjet e 9 shkurtit”, thuhet në reagim.

Konstituimi i Kuvendit dështoi sot përshkak të bllokadës në zgjedhjen e nënkryetarit nga komuniteti serb. Kryetari i ri i Kuvendit, Dimal Basha ndërpreu seancën për ta vazhduar atë të enjten në ora 11:00.

“Marrë parasysh situatën që gjindemi, edhe kërkesat nga subjektet tjera, në frymën e bashkëpunimit, unë propozoj që ta ndërpres seancën këtu, dhe shihemi ditën e enjte në ora 11:00”, tha Basha para deputetëve.

Lista Serbe fillimisht propozoi Sllavko Simiqin tri herë radhazi për nënkryetar të Kuvendit, por i njëjti në asnjë nga votimet s’mori votat e mjaftueshme.

Në votimet e tij, ai kishte veç 10 vota për. LDK nuk mori pjesë në asnjë nga votimet.

Bazuar në aktgjykimin e Gjykatës Kushtetuese, ku i njëjti kandidat nuk lejohet të propozohet më shumë se tri herë, Lista Serbe nuk pranoi ta ndryshonte emrin, pavarësisht kërkesës së Kryeparlamentarit.

Në këtë rast, hyri në funksion pika e 7 e nenit 12 të Rregullores së Punës së Kuvendit, me procedurë të shortit.

Nga shorti, kandidatja e parë ishte deputetja, Verica Çeraniq e cila poashtu s’arriti të marrë votat e mjaftueshme për nënkryetare të Kuvendit. Ajo u hodh në votim po nga shorti dy herë, pasi në herën e tretë nuk refuzoi dhe nuk u hodh në votim fare. Kandidati i dytë përmes shortit ishte, Stefan Kovaçeviq. As ai s’mori vota për tu zgjedhur nënkryetar i Kuvendit nga komuniteti serb. Asnjë votë për, 48 kundër dhe 19 abstenime.

Kandidatja e radhës, Liljana Stafaneviq refuzoi të ishte kandidate për nënkryetare, andaj nuk u hodh në votim fare.

Nenad Rashiq, ishte kandidatura tjetër përmes shortit, e që as ai s’mori votat e mjaftueshme. Derisa në sallë ishin 95 deputetë. VV-ja votoi për Nenad Rashiq nënkryetar të Kuvendit, ndërsa PDK-ja abstenoi. Por, pavarësisht kësaj, Rashiq s’u bë nënkryetar, as me 55 votat e VV-së. Një kundër dhe 17 abstenime.

Në të gjitha këto votime që u bën me short, Lista Serbe nuk mori pjesë fare në votim./Reporteri.net