Zyrtare: Qeveria e Kosovës jep 20 mijë euro për katedralen e djegur në Paris

Qeveria e Kosovës ka vendosur sot që të ndajë 20 mijë euro në mënyrë simbolike për katedralen “Notre Dame”, e djegur para disa ditësh.


Më herët Reporteri.net shkruajti se shuma e ndarë është 20 mijë euro, e cila shumë u konfirmua në fillim të mbledhjes së sotme të Qeverisë.

Ndarjen e kësaj shume e ka konfirmuar edhe zëdhënësja e Qeverisë, Donjeta Gashi, e cila për Reporteri.net tha shkurt se “po, mori vendim Qeveria: u ndanë”.

Sidoqoftë, ky vendim i Qeverisë, të cilin e paralajmëroi dje Haradinaj, u kritikua mjaft shumë, duke u cilësuar i panevojshëm. Mirëpo, kryeqeveritari kërkoi konsideratë pasi, sipas tij, kjo shumë është simbolike meqë Franca ka ndihmuar shtetin e Kosovës.

Ndërkohë dje, Qeveria e Ramës ndau për Francën 100 mijë euro ndihmë për renovimin e katedrales së famshme të Parisit, “Notre Dame”.

Ndryshe, për renovimin e kësaj katedraleje dje presidenti francez, Emannuel Macron, tha se nevojiten 5 vjet. Për të deri tani janë dhuruar mbi 1 miliard euro./Reporteri.net