Një studim i ri ka zbuluar mikroplastika thellë brenda tumoreve të kancerit të prostatës, duke ngritur më shumë pikëpyetje rreth rolit që këta ndotës të përhapur gjerësisht luajnë në shëndetin publik, raporton NBC News, përcjell Reporteri.net.

Gjetjet, të cilat vijnë nga një studim i vogël me 10 burra, u prezantuan të hënën në Simpoziumin për Kanceret Gjenitourinare të American Society of Clinical Oncology dhe ende nuk janë publikuar në një revistë shkencore.

Studiuesit analizuan mostra indesh të marra nga 10 burra me kancer të prostatës, me një moshë mesatare 65 vjeç, të cilëve prostata u ishte hequr si pjesë e trajtimit të sëmundjes. Ata analizuan gjithashtu inde jo kanceroze të marra nga ana e kundërt e organit.

Mikroplastikat ishin të pranishme në 90% të tumoreve dhe në 70% të mostrave jo kanceroze. Indet kanceroze përmbanin mesatarisht 2.5 herë më shumë plastikë sesa indet jo kanceroze, me rreth 40 mikrogramë plastikë për gram indi.

Dr. Stacy Loeb, autorja kryesore e studimit dhe urologe në NYU Langone Health, tha se përqendrimet më të larta në indet tumorale “ishin shumë befasuese dhe shqetësuese”.

Kjo “ngriti pyetje nëse mund të ketë një lidhje me zhvillimin e kancerit të prostatës”, tha ajo. “Pra, kjo është padyshim diçka që do të vazhdojmë ta studiojmë më tej me më shumë raste.”

Dr. Michael Eisenberg, profesor i urologjisë në Stanford University School of Medicine, i cili nuk ishte i përfshirë në studim, tha se kërkimi i ri nuk vendos një marrëdhënie shkak-pasojë.

Megjithatë, “po gjejmë shumë sinjale mbi përhapjen e habitshme të mikro/nanoplastikave dhe lidhjet shqetësuese me problemet shëndetësore”, shkroi ai.

“Na duhen më shumë të dhëna për të kuptuar pasojat e këtyre gjetjeve.”

Studimi nuk është i pari që gjen mikroplastika në tumoret e kancerit të prostatës.

Një studim i vitit 2024, i publikuar në The Lancet nga studiues në Kinë, gjeti gjithashtu nivele më të larta plastike në tumore krahasuar me indet përreth. Loeb tha se studimi i ri përdori teknika më të sakta për të matur llojet e ndryshme të plastikës të gjetura në mostra.

Sipas ekspertëve, mikroplastika mund: të rrisë dëmtimin e qelizave, të ndikojë në sistemin imunitar, të shtojë inflamacionin në inde dhe të transportojë kimikale potencialisht kancerogjene si ftalatet dhe bisfenolët, që gjenden shpesh në ambalazhe plastike./Reporteri.net