Shkruan Binak Kelmendi

Një helmetë
E korroduar
E çjerrë
E brimuar
Tullace koha
Në kufirin e afërt
Bunker komunist
Dhe aeroplan imperialist
Shikohen për nishan
Tutje deti ujë kripëtimë
Qeshje ironike
“Demka mba’ shënim”…
Një qëndrim piktural
Para aparatit fotografik
Pa ngjyra te paneli
Me brushën e lagur
Në festival këngësh buzë fqinjit armik klasor
Më bëj një akt historie me helmetën, të lutëm thashë
Artist i rrëgjuar epoke
Mbi dymijë vjet i lashtë
I ri si sot
Sa uji sa toka sa guri para zjarrit
Në formësim të kosmosit
Duke bërë kontinente kombe gjuhë
Popuj jashtilirikë
Më bëj një foto
Me kaskë ilire
Preke butonin
Kjo është
Teknikë
Kujtim
Kronikë
Testament
Tapi
Helmetë mbi veshë
Asgjë nuk dëgjon
Asgjë nuk sheh
Vetëm shiu lag
Dhe korrodon
Te këneta në kufi
Kaskë ilire
Vetëm dymijepesëqind vjet e re

(Tiranë, mars 1992, pas kthimit nëpër mjegull e shi nga Gjirokastra)