Boksierja kosovare Donjeta Sadiku i ka siguruar Kosovës medaljen e parë në Lojërat Mesdhetare “Taranto 2026”.

Sadiku triumfoi ndaj boksieres turke Esmanur Lok, duke u kualifikuar në gjysmëfinale dhe duke i garantuar Kosovës një medalje nga këto gara.

Në gjysmëfinale, Sadiku do të përballet me greken Sofia Legaki, në duelin që zhvillohet të mërkurën. Boksierja kosovare synon të vazhdojë rrugëtimin drejt medaljes së artë.

Lajmin e ka bërë të ditur Komiteti Olimpik i Kosovës (KOK), i cili ka vlerësuar paraqitjen e Sadikut në këto gara.

“Donjeta Sadiku i ka siguruar vendit tonë medaljen e parë nga Lojërat Mesdhetare ‘Taranto 2026’. Boksierja jonë fitoi ndaj turkes Esmanur Lok, për t’u kualifikuar në gjysmëfinale, ku synon të vazhdojë rrugëtimin drejt medaljes së artë”, thuhet në njoftimin e KOK-ut.

Sipas KOK-ut, Sadiku në përballjen e saj u përkrah nga drejtuesit e Komitetit Olimpik të Kosovës, me presidentin Ismet Krasniqi, si dhe nga drejtues të Ministrisë së Sportit dhe Rinisë dhe Komunës së Prishtinës.

Gjysmëfinalja ndaj Sofia Legakit zhvillohet të mërkurën, ku Sadiku do të kërkojë një tjetër fitore për të kaluar në finale.