Kryeministri i Kosovës, Ramush Haradinaj ka marrë pjesë në gjysmë maratonën e sotme të zhvilluar në Prishtinë.

Ai ka përfunduar me sukses këtë gjysmë maratonë prej 21 kilometrash, duke vrapuar me gruan e tij, Anitën, shkruan Reporteri.net

Haradinaj ka vrapuar me fanellë të Liverpoolit ndërsa pas përfundimit të garës ka zbuluar arsyen pse sot veshi pikërisht fanellën e ekipit anglez.

Ai ka thënë se i ka premtuar vëllaut të Xherdan Shaqirit se do të vraponte me fanellë të tij në këtë gjysmë maratonë.

“Ditë e mrekullueshme në kryeqytet, ku u mbajt gara me karakter ndërkombëtar, Gjysmëmaratona e Prishtinës, e cila tashmë është bërë tradicionale. Duke mbajtur fjalën qe i kam dhënë vëllaut të Xherdan Shaqirit, vrapova me fanellën e yllit tonë në futboll. Një sfidë personale, të cilën e përfundova me sukses, ndonëse me një minutë vonesë krahasuar me vitin paraprak. Përgëzoj të gjithë pjesëmarrësit me të cilët ndamë shtegun e vrapimit, organizatorët, pjesëtarët e Policisë, ekipet mjekësore, vullnetarët dhe ushtarët e FSK-së për mbarëvajtjen e kësaj ngjarje masive, e cila përmes sportit promovon vendin tonë në botë”

Në këtë gjysmë maraton kryeministri Ramush Haradinaj ishte i shoqëruar nga gruaja e tij Anita./Reporteri.net/