Tri vjet pas anëtarësimit në UEFA, kryetari i FFK-së kujton ditët e vështira të futbollit kosovar

Sot bëhen tri vjet që kur Kosova u pranua nga Kongresi i UEFA-s në Budapest si anëtare e pavarur. Që nga atëherë, Kosova tani ka të drejtën të luajë të gjitha garat ndërkombëtare, si dhe klubet e Kosovës mund të marrin pjesë në garat elitare të futbollit në Evropë. Me rastin e këtij përvjetori, kryestari i Federatës së Futbollit të Kosovës e ka publikuar një letër urimi.


Më 3 maj të vitit 2016, Kongresi i UEFA-s në Budapest votoi me shumicë të vogël pro pranimit të Kosovës si anëtare e pavarur. Kosova u bë anëtarja e 55-të e shtëpisë së futbollit të Evropës, shkruan Gazeta Express.

Fadil Vokrri kishte qenë kryetar i Federatës së Futbollit të Kosovës në atë kohë, dhe menjëherë pas votimit ishte shprehur shumë i emocionuar nga kjo arritje.

Agim Ademi e ka falënderuar Vokrrin për kontributin, por i ka kujtuar edhe ata persona për të cilët thotë se e sakrifikuan kafshatën e gojës për ta mbajtur gjallë futbollin në Kosovë.

“Sot për ne dhe për futbollin e Kosovës është një ditë e madhe dhe e shënuar në historinë e futbollit tonë dhe jo vetëm. Si sot, tre vite më parë, në Kongresin e UEFA-s në Budapest, FFK-ja u anëtarësua me të drejta të plota në UEFA, duke i dhënë fund izolimit 25-vjeçar dhe duke e hapur një epokë të re në historinë e futbollit tonë”, shkruhet në urimin e Ademit.

“Kjo ditë solli emocione e lot gëzimi kudo në Kosovë e Diasporë, pasi për një vendim të tillë meritor ishte pritur me dekada dhe u sakrifikuan shumë breza. Ishte një ditë në të cilën ngadhënjeu drejtësia dhe futbolli, e ku u shpërblye mundi, djersa e sakrifica e shumë gjeneratave pa dallim”.

“Kjo ditë shënoi kthesën e shumëpritur për futbollin e Kosovës për të ecur përpara drejt rezultateve dhe integrimeve në familjen e futbollit evropian, aty ku edhe e kemi vendin dhe ku po marshojmë me dinjitet dhe me rezultate të mira”.

“Që nga ajo periudhë FFK-ja ka bërë hapa të mëdhenj në zhvillimin e saj si federatë, derisa Kombëtarja e Kosovës ka krijuar një ekip shumë cilësor, ku me lojërat e paraqitura sidomos në Ligën e Kombeve, por edhe në ciklin kualifikues për Euro 2020, ka bërë krenar tërë kombin dhe është shndërruar në storie suksesi për vendin tonë kudo në botë”.

“Po ashtu, edhe ekipet zingjir të grupmoshave të Kombëtares gjatë kësaj kohe janë konsoliduar, derisa pjesëmarrja e klubeve në garat evropiane ka ndikuar në ngritjen e cilësisë dhe të organizimit në kampionatin vendor”.

“Prandaj, shfrytëzoj rastin që në këtë ditë të veçantë t’i falënderoj të gjithë ata që punuan në vazhdimësi dhe brez pas brezi që sot ta gëzojmë këtë ditë. Falënderoj gjeneratat para nesh që morën guximin dhe i thanë “JO” regjimit okupator dhe e mbajtën gjallë futbollin në kushte jashtëzakonisht të vështira, duke e ndarë edhe kafshatën e gojës për ta mbajtur gjallë futbollin e Kosovës, si dhe të gjithë ata njerëz të vullnetit të mirë që arat pjellore i lëshuan për t’i shndërruar në fusha futbolli”.

“Po ashtu i kujtoj me krenari të gjithë ata që punuan dhe ndihmuan për këtë ditë të madhe e që më nuk janë në mesin tonë, posaçërisht ish-presidentin, Fadil Vokrri, por edhe të gjithë të tjerët që kanë qenë pjesë e futbollit”.

“Urime kjo ditë e madhe të gjithë anëtarëve të KE-së, të gjitha klubeve dhe kryetarëve të tyre, futbollistëve, organeve tjera të futbollit (delegatëve të Kuvendit të FFK-së, Komisioneve, gjyqtarëve, delegatëve të ndeshjeve), tifozëve “Dardanët” si dhe tërë popullit të Kosovës”.