Ministria e Jashtme e Iranit ka refuzuar të konfirmojë nëse delegacionet iraniane dhe amerikane do të takohen javën e ardhshme, ashtu siç u sugjerua nga Presidenti amerikan Donald Trump të mërkurën.

“Nuk kemi asgjë për të thënë lidhur me deklaratat kontradiktore të SHBA-së për diplomacinë dhe negociatat,” tha zëdhënësi i Ministrisë së Jashtme, Esmail Baghaei, në një konferencë për shtyp në Teheran të enjten.

“Duhet të sigurohemi nëse palët janë serioze apo nëse kjo është thjesht një tjetër taktikë për të mbjellë përçarje në rajon dhe në vendin tim.”

Baghaei deklaroi se nga zyrtarët amerikanë ka pasur shumë kundërthënie.

“Ndërsa flisnin për diplomaci, vetëm dy ditë para takimit tonë në Muskat, i dhanë Izraelit dritën jeshile për të sulmuar Iranin. A ka mbetur ndonjë besim?” tha ai.

Të mërkurën, Trump u tha gazetarëve në Hagë se SHBA-ja do të takohet me Iranin javën e ardhshme për një marrëveshje të mundshme bërthamore, ndonëse përsëriti disa herë se nuk e sheh një marrëveshje të tillë si “të domosdoshme”.

“Do të flasim me ta javën tjetër, me Iranin. Mund të nënshkruajmë një marrëveshje, nuk e di. Për mua, nuk mendoj se është aq e domosdoshme. Ata bënë luftë, luftuan, tani po kthehen në botën e tyre. S’më intereson nëse kemi marrëveshje apo jo,” tha Trump gjatë një konference për shtyp në fund të samitit të NATO-s.

“E vetmja gjë që do të kërkojmë është ajo që kërkuam edhe më parë,” shtoi ai, duke theksuar sërish se nuk e sheh marrëveshjen si të nevojshme për shkak të bindjes së tij se SHBA ka shkatërruar me sukses kapacitetet bërthamore të Iranit, pavarësisht vlerësimeve të hershme të inteligjencës që sugjerojnë të kundërtën.

Trump deklaroi se programi bërthamor i Iranit është shkatërruar.