Një oficer i lartë në forcat e sigurisë së Hamasit i ka thënë BBC-së, se grupi i armatosur palestinez ka humbur rreth 80% të kontrollit të tij mbi Rripin e Gazës dhe se klanet e armatosura po e mbushin boshllëkun.

Nënkoloneli tha se sistemi i komandës dhe kontrollit të Hamasit kishte rënë për shkak të muajve të sulmeve izraelite që kanë shkatërruar udhëheqjen politike, ushtarake dhe të sigurisë së grupit.

Oficeri u plagos në javën e parë të luftës, e cila filloi pas sulmit të udhëhequr nga Hamasi ndaj Izraelit më 7 tetor 2023, dhe që atëherë është larguar nga detyrat e tij për arsye shëndetësore.

Ai ndau disa audio mesazhe me BBC-në në kushte anonimiteti.

Në mesazhe, oficeri pikturoi një pamje të shpërbërjes së brendshme të Hamasit dhe rënies pothuajse totale të sigurisë në të gjithë Gazën, të cilën grupi e qeveriste para konfliktit.

“Le të jemi realistë këtu – mezi ka mbetur asgjë nga struktura e sigurisë. Shumica e udhëheqjes, rreth 95%, tani janë të vdekur. Figurat aktive janë vrarë të gjitha. Pra, çfarë po e ndalon Izraelin të vazhdojë këtë luftë””, tha ai.

“Logjikisht, duhet të vazhdojë deri në fund. Të gjitha kushtet janë të harmonizuara: Izraeli ka epërsinë, bota hesht, regjimet arabe heshtin, bandat kriminale janë kudo, shoqëria po shembet”, shtoi ai.

Shtatorin e kaluar, ministri i atëhershëm i Mbrojtjes i Izraelit, deklaroi se “Hamasi si formacion ushtarak nuk ekziston më” dhe se ishte i angazhuar në luftë guerile.

Sipas oficerit, Hamasi u përpoq të riorganizohej gjatë armëpushimit 57-ditor me Izraelin në fillim të këtij viti, duke riorganizuar këshillat e tij politikë, ushtarakë dhe të sigurisë.

Por që kur Izraeli i dha fund armëpushimit në mars, ai ka synuar strukturat e mbetura të komandës së Hamasit, duke e lënë grupin në rrëmujë.

“Lidhur me situatën e sigurisë, më lejoni të jem i qartë: ajo është shembur plotësisht. Totalisht e zhdukur. Nuk ka kontroll askund”, tha ai.

“Njerëzit plaçkitën aparatin më të fuqishëm të sigurisë së Hamasit (Ansar), kompleksin që Hamasi përdori për të sunduar Gazën. Ata plaçkitën gjithçka, zyrat – dyshekët, madje edhe panelet e zinkut – dhe askush nuk ndërhyri. Pa polici, pa siguri”, shtoi ai.

Oficeri tha se një pasojë e boshllëkut të sigurisë ishte se bandat ose klanet e armatosura, ishin “kudo”.

“Ata mund të të ndalonin, të të vrisnin. Askush nuk do të ndërhynte. Kushdo që përpiqej të vepronte vetë, si të organizonte rezistencë kundër hajdutëve, bombardohej nga Izraeli brenda gjysmë ore. Pra, situata e sigurisë është zero. Kontrolli i Hamasit është zero. Nuk ka udhëheqje, as komandë, as komunikim. Pagat vonohen dhe kur mbërrijnë, mezi përdoren. Disa vdesin vetëm duke u përpjekur t’i mbledhin. Është një kolaps total”, tha ndër tjera.

Më 26 qershor, të paktën 18 persona u vranë kur një sulm me dron izraelit shënjestroi një njësi policore të Hamasit me rroba civile që përpiqej të merrte kontrollin mbi një treg në Deir al-Balah, duke akuzuar shitësit për rritje çmimesh dhe shitje ndihmash të plaçkitura, thanë dëshmitarë dhe mjekë.

Ushtria izraelite tha se goditi “disa terroristë të armatosur” që i përkisnin Forcave të Sigurisë së Brendshme të Hamasit.

Në këtë boshllëk, gjashtë grupe të armatosura të lidhura me klane të fuqishme lokale, kanë dalë si pretendentë seriozë për të mbushur boshllëkun, sipas oficerit.

Këto grupe kanë qasje në para, armë dhe njerëz, dhe janë aktive në të gjithë Gazën, por kryesisht në jug.

Njëri prej tyre udhëhiqet nga Yasser Abu Shabab, një figurë që ka tërhequr vëmendjen e Autoritetit Palestinez, i cili është i vendosur në Bregun Perëndimor të pushtuar dhe është rival i Hamasit, si dhe të lojtarëve rajonalë – veçanërisht pasi Izraeli konfirmoi muajin e kaluar se po e furnizonte atë me armë.

Oficeri konfirmoi se Hamasi kishte vendosur një shpërblim të madh për kokën e Abu Shabab, nga frika se ai mund të bëhej një figurë unifikuese për shumë armiq të tij.

“Hamasi do t’i injoronte hajdutët e zakonshëm. Njerëzit janë të uritur dhe [luftëtarët] nuk duan të provokojnë më shumë kaos. Por ky djalë? Nëse luftëtarët e Hamasit e gjejnë, ata mund të shkojnë pas tij në vend të tankeve izraelite”, shtoi ai.

Burime në Gaza i thanë BBC-së se Abu Shabab po punonte për t’u koordinuar me grupe të tjera të armatosura për të formuar një këshill të përbashkët që synonte rrëzimin e Hamasit. /Telegrafi/