Sulmet e reja të SHBA-së ndaj Iranit ishin “absolutisht të nevojshme”, tha të mërkurën sekretari i përgjithshëm i NATO-s, Mark Rutte.

“Kur ke një armëpushim dhe Irani në thelb po e shkel atë, mendoj se është plotësisht thelbësore që SHBA të reagojë me forcë”, u tha Rutte gazetarëve në margjina të samitit të liderëve të NATO-s në Ankara.

SHBA ka ndërmarrë sulme “të fuqishme” ndaj Iranit si përgjigje ndaj sulmeve mbi tre cisterna nafte në Ngushticën e Hormuzit, raporton BBC.

Komanda Qendrore e SHBA-së (Centcom) tha të martën se kishte goditur mbi 80 objektiva, përfshirë më shumë se 60 mjete të vogla lundruese të Trupave të Gardës Revolucionare Islamike (IRGC) në ngushticë.

Mediat shtetërore iraniane thanë se sulmet goditën ishullin Qeshm, Bandar Abbas dhe Sirik, ku njerëz janë plagosur nga copëzat e predhave. Irani nuk ka marrë drejtpërdrejt përgjegjësinë për sulmet ndaj tre cisternave që çuan në ndërhyrjen ushtarake amerikane./Reporteri.net/