Çmimi i naftës në Kosovë ka mbërritur në vlerën më të lartë që prej fillimit të majit.
Sot, 22 korrik, një litër naftë sipas vendimit të Ministrisë së Industrisë e Tregtisë, do të kushtojë maksimalisht 1.67 euro, një cent më shtrenjtë se dje. Një litër benzinë kushton 1.48 euro, po ashtu një cent më shtrenjtë e gasi 60 centë – njëjtë sikur dje.
Deri tash, që prej 5 majit, një litër nuk ka kushtuar më shtrenjtë. Atë kohë, një litër naftë kushtonte 1.67 euro. Një litër benzinë atë ditë kushtonte 1.52 euro, ndërsa gasi 81 centë.
Prej asaj kohe e deri javën e shkuar, ishte në fuqi një armëpushim që Shtetet e Bashkuara të Amerikës e arritën me Iranin. Armëpushimi bëri që nafta në bursë të kishte çmim më të ulët.
Por ditë më parë u rikthyen sulmet dhe u rimbyll Ngushtica e Hormuzit, që shërben si rrugë për 20 për qind të naftës në nivel bote. Çmimi i naftës nisi të ngrihej menjëherë.
