Shtetet e Bashkuara të Amerikës kanë njoftuar një paketë të re sanksionesh ndaj Kubës, duke goditur individë të lidhur me elitën politike, një bankë shtetërore dhe katër subjekte që operojnë në sektorët e energjisë, metaleve dhe minierave.

Departamenti amerikan i Shtetit deklaroi se masat janë pjesë e politikës së administratës së presidentit Donald Trump për të rritur presionin ndaj qeverisë kubane, të cilën Washingtoni e akuzon për represion dhe për veprime që, sipas tij, cenojnë sigurinë kombëtare amerikane dhe stabilitetin në Hemisferën Perëndimore.

Në mesin e personave të përfshirë në listën e sanksioneve është edhe Fidel Ernesto Castro Calis, nipi i ish-presidentit Raul Castro.

Sipas Departamentit të Shtetit, ndaj tij janë marrë masa në bazë të një urdhri ekzekutiv të firmosur nga presidenti Trump në muajin maj.

Sanksionet prekin gjithashtu Banco Exterior de Cuba, për shkak të rolit të saj në sistemin financiar të vendit.

Katër subjektet e tjera të sanksionuara lidhen me sektorët e burimeve natyrore dhe energjisë në Kubë. Mes aktiviteteve të tyre përfshihen nxjerrja e nikelit dhe kobaltit, si dhe furnizimi, tregtia dhe aktivitetet e lidhura me naftën.

Në bazë të masave amerikane, çdo pasuri e individëve dhe kompanive të sanksionuara që ndodhet nën juridiksionin e Shteteve të Bashkuara do të bllokohet. Gjithashtu, qytetarëve dhe kompanive amerikane u ndalohet të kryejnë transaksione me subjektet e listuara, përveç rasteve kur ato autorizohen nga Departamenti i Thesarit.

Sekretari amerikan i Shtetit, Marco Rubio, e cilësoi qeverinë kubane si një kërcënim të rëndësishëm për interesat amerikane.

Rubio akuzoi familjen Castro dhe zyrtarë të lidhur me pushtetin në Kubë se vazhdojnë të kontrollojnë pjesë të rëndësishme të ekonomisë së vendit. Sipas tij, masat e reja synojnë rrjetet financiare dhe ekonomike që mbështesin sektorët minerarë dhe energjetikë të Kubës.

Administrata amerikane po vijon kështu politikën e presionit ekonomik ndaj Havanës, duke përdorur sanksionet si një nga instrumentet kryesore kundër qeverisë kubane.