Kylian Mbappe është duke u hetuar nga drejtësia franceze dhe është intervistuar nga policia në lidhje për një skandal korrupsioni.
Hetimi ka të bëj me pagesa të dyshimta për ish-shefin e sigurisë të Përfaqësueses së Francës. E përfshirë në këtë rast është edhe nëna e sulmuesit 27-vjeçar të Real Madridit.
Mediumet franceze kanë përmendur Mohamed Sanhadjin, i cili për më shumë se 20 vjet ka punuar si zyrtar policor për sigurinë e “Les Bleus” dhe ka krijuar marrëdhënie të afërta me lojtarët.
Hetuesit janë duke e parë nëse ai ka krijuar këto marrëdhënie për përfitime personale.
L’Equipe ka shkruar të enjten se Mbappe është intervistuar në Paris më 30 shtator.
Hetuesit janë duke u interesuar për një transferim të parave në qershor 2023. Mbappe e pagoi Sanhadjin 60 mijë e 300 euro nga bonuset e fituara në Kupën e Botës në Katar.
Sipas përfaqësuesve të Mbappes, këto para ishin shenjë falënderimi për forcat e sigurisë, ndërsa kanë përfituar edhe katër zyrtarë tjerë policorë. Sanhadji dyshohet se e kishte fshehur pagesën nga eprorët e tij.
Vetëm pak javë më vonë, zyrtari policor e kishte shoqëruar yllin e Real Madridit në Kamerun. Hetuesit tani dëshirojnë ta dinë nëse ai ishte privatisht përgjegjës për sigurinë e Mbappes atje dhe nëse i ka pranuar paratë si shpërblim.
Në vitin 2024, Mbappe i kishte dhënë shefit të sigurisë hua prej 120 mijë eurove nëpërmjet nënës së tij. 52-vjeçarja Fayza Lamari, nëna e superyllit francez, thuhet se i ka kërkuar Sanhadjit ndihmë për aplikim në katër viza, për njerëz të afërt të saj. Ajo është intervistuar më 9 tetor në lidhje me këtë çështje.
Sanhadji thuhet se ka marrë para edhe nga ish-yjet e Francës, Franck Ribery, Raphael Varane dhe Laurent Blanc.
Në total thuhet se Sanhadji ka pranuar 300 mijë euro nga futbollistët.
