Kreu i Partisë Demokratike, Sali Berisha, deklaroi se përpjekja e kryeministrit Edi Rama për të përçarë protestën studentore ka dështuar, duke e cilësuar atë si një përpjekje të turpshme dhe të dëshpëruar.
Në një prononcim për mediat, Berisha u shpreh se studentët dhe gjimnazistët nuk kërkojnë përmirësimin e qeverisë, por largimin e Edi Ramës nga pushteti.
Ai përdori edhe një gjuhë të ashpër ndaj atyre që, sipas tij, po përpiqen të krijojnë përçarje brenda protestës, duke i cilësuar si “Jago të revoltës studentore”.
“Studentët e revoltuar, gjimnazistët i kanë prerë biletën Edi Ramës. Nuk besojnë kurrë se ai mund të përmirësohet. Janë të bindur se ka kryer krime të rënda dhe duhet të largohet menjëherë nga pushteti”, deklaroi Berisha.
Kreu i PD-së bëri thirrje për mbështetje të gjerë ndaj protestës studentore, duke theksuar se dallimet politike dhe programore nuk duhet të pengojnë bashkimin kundër qeverisë.
Berisha dënoi gjithashtu dhunën policore dhe kërkoi lirimin e menjëhershëm të studentëve të shoqëruar në komisariate.
Në fund, ai iu drejtua edhe efektivëve të policisë, duke i ftuar të mos bëhen pjesë e asaj që e cilësoi dhunë ndaj protestuesve.
“Të hedhin kapelat, të bashkohen me studentët, se studentët po bëjnë një betejë për çdo shqiptar, edhe për policët dhe fëmijët e tyre”, përfundoi Berisha.
