Sarajeva ndaloi për një minutë sot, për të përkujtuar gjenocidin në Srebrenicë.

Në zonën e kantonit të Sarajevës sirenat kanë rënë sot në mesditë për përkujtimin e 29 vjetorit të gjenocidit në Srebrenicë, transmeton gazeta online Reporteri.net.

Në përputhje me apelin e mëhershëm të Administratës Kantonale të Mbrojtjes Civile të Sarajevës, gjatë sirenave, qytetarët  ndaluan në rrugë, ndalën automjetet e tyre dhe dolën në rrugë, duke bërë homazhe për viktimat e gjenocidit.

Në këtë ditë, më 11 korrik, 29 vjet më parë u krye gjenocidi në Srebrenicë, një nga krimet më të mëdha në historinë e njerëzimit.

Në Qendrën Përkujtimore të Srebrenicës – Potoçari, eshtrat e 14 viktimave të gjenocidit do të varrosen sot në një funeral kolektiv.

Gjykata Ndërkombëtare e Drejtësisë në Hagë e karakterizoi krimin në Srebrenicë si gjenocid në vitin 2007. Beogradi zyrtar dhe autoritetet e entitetit serb të Bosnjë e Hercegovinës, Republika Sërpska, e mohojnë gjenocidin.

Në korrik të vitit 1995, forcat serbe të Bosnjës vranë mbi 8 mijë burra dhe djem myslimanë në enklavën e Srebrenicës, që ishte caktuar si “vend i sigurt” nga Kombet e Bashkuara.

Çdo vit më 11 korrik, eshtrat e atyre që identifikohen gjatë vitit të fundit varrosen në Qendrën përkujtimore të Potoçari./Reporteri.net/.

Nga famëkeqi Ratko Mladiq, e Radovan Karaxhiq – kush me sa vjet burgim u dënua për gjenocidin në Srebrenicë