Haradinaj kritikon deputetët e PDK-së: Edhe këta u dashtë me i rrotullu e me i shti brenda Kuvendit

Policia e Kosovës ka publikuar edhe një komunikatë me të dhënat e fundit nga protesta që përshkallëzoi në Prishtinë.

Siç thuhet në njoftim, gjashtë zyrtarë policorë kanë pësuar lëndime dhe kanë pranuar tretman mjekësorë si dhe 11 protestues kanë kërkuar ndihmë mjekësore po ashtu.

Siç thuhet tutje në njoftim, Policia e Kosovës ka intervenuar me gaz lotsjellës, përfshirë topin e ujit për të shpërndarë protestuesit me qëllim që të parandalohet eskalimi i mëtejmë i situatës.

Kumtesa: 

KOMUNIKATË PËR MEDIA- (shtesë)
Angazhimet policore në mbarëvajtje të sigurisë dhe menaxhim të protestës
Prishtinë, më 05 tetor 2026

Referuar situatës dhe zhvillimeve të ndodhura në orët e mbrëmjes pranë institucioneve shtetërore të Republikës së Kosovës, ku disa protestues në vazhdimësi kanë hedhur mjete piroteknike, fishekzjarre e mjete të forta, ndaj objektit të Qeverisë dhe Kuvendit të Kosovës, Policia e Kosovës me qëllim të vënies së situatës nën kontroll dhe parandalimit të eskalimit të mëtejme të situatës, është detyruar disa herë të veprojë ndaj protestuesve që kanë shfaqur dhunë, duke përdorur pajisjet e nevojshme policore, gazin lotsjellës përfshirë topin e ujit për shpërndarje të turmës.

Policia e Kosovës, për shkaqe sigurie të qytetarëve dhe pjesëmarrësve në trafik, është detyruar që në intervale të ndryshme kohore të ndalojë për qarkullim lëvizjen e automjeteve në disa rrugë përreth qendrës së kryeqytetit, në zonat ku po zhvillohet protesta.

Si pasojë e protestës dhe zhvillimeve në terren, mosrespektimit të thirrjeve të vazhdueshme policore për qetësi dhe rënies ndesh me ligjin, janë shoqëruar në stacion policor tre (3) persona/protestues, ndaj të cilëve të gjitha veprimet e mëtejme do të ndërmerren në bashkëpunim dhe koordinim me organet e drejtësisë.

Bazuar në informacionet e deritanishme, si pasojë e sulmit dhe hedhjes së mjeteve të ndryshme ndaj objekteve shtetërore dhe në disa raste ndaj zyrtarëve policorë që kanë qenë në detyrë zyrtare, gjashtë (6) zyrtarë policorë kanë pësuar lëndime të natyrave të ndryshme, të cilëve iu është ofruar tretmani mjekësor. Po ashtu, sipas informacioneve të deritanishme njëmbëdhjetë (11) qytetarë/protestues kanë kërkuar ndihmë mjekësore, të cilëve po ashtu iu është ofruar ndihma mjekësore, informacione këto të cilat mund të ndryshojnë varësisht nga zhvillimet.

Policia e Kosovës për asnjë ditë dhe në asnjë rast nuk ka vepruar ndaj protestuesve të cilët kanë protestuar në mënyrë të qetë e demokratike, por ka vepruar vetëm në rastet kur protestuesit kanë shfaqur dhunë ndaj institucioneve dhe zyrtarëve policorë, të cilët në vazhdimësi përmes komunikimeve me protestues dhe përmes thirrjeve publike, ka vazhduar së apeluari që të protestohet në mënyrë të qetë dhe në suaza ligjore.

Protesta edhe në këto orë të vona është duke vazhduar e cila aktualisht është e qetë, përderisa zyrtarët policorë do të jenë të pranishëm në terren për të garantuar rendin dhe sigurinë publike, siç e kemi theksuar në vazhdimësi siguria e qytetarëve, siguria e pronës publike e private si dhe mbarëvajtja e protestës së qetë vazhdojnë të jenë interes i Policisë së Kosovës.

Ministrja e Mjedisit dhe Planifikimit Hapësinor, Fitore Pacolli ka reaguar pas protestës së sotme dhe eskalimit të situatës. Ajo ka thënë se ish-krerët e Ushtrisë Çlirimtare në Hagë nuk mbrohen pa president dhe se përpjekja për ta barazuar fatin politik të një partie me fatin historik të UÇK-së është keqpërdorim.

“E qysh po ua merr mendja me i mbrojtë ata në Hagë, pa president e në fushatë zgjedhore? Kë po dojnë me e mbrojtë kështu? Se ata në Hagë, jo që nuk po i mbrojnë, por po i keqpërdorin për fushatë. Përpjekja për ta barazuar fatin politik të një partie me fatin historik të UÇK-së është keqpërdorim i luftës për interesa të ngushta partiake. Ne kemi qenë dhe jemi kundër kësaj Gjykate”, ka shkruar Pacolli në Facebook.

Ajo tutje ka shkruar se mënyra më e mirë për t’i mbrojtur ish-krerët e UÇK-së në Hagë është duke i funksionalizuar institucionet e vendit “dhe të punojmë bashkë në mbrojtjen e luftës çlirimtare të Kosovës, e cila ishte e drejtë dhe e pastër.”

Organizata e Veteranëve të Ushtrisë Çlirimtare të Kosovës u ka bërë thirrje protestuesve që nesër në mëngjes të mblidhen sërish në sheshin e Prishtinës.

Nesër është afati i fundit për zgjedhjen e presidentit ose vendi shkon në zgjedhje brenda 45 ditësh. Rrjedhimisht edhe afati i fundit për t’u votuar në lexim të dytë plotësim/ndryshimi i Ligjit për Specialen.

“Popull i dashur. Kategori të dala nga lufta e UÇK-së. Nesër, mëngjesi duhet të na gjejë të gjithëve në sheshin e Prishtinës. Të bashkuar dhe me dinjitet, për të mbrojtur atë që është e jona dhe për të dëshmuar se UÇK-ja na bashkon”, thuhet në postimin në Facebook të OVL UÇK-së.

Drejtori i Emergjencës, Naser Syla ka bërë të ditur se 12 persona kanë kërkuar ndihmë mjekësore si pasojë e lëndimeve në protestën e sotme.

Prej të lënduarve një është zyrtar policor ndërsa 11 të tjerë janë protestues.

Syla ka bërë të ditur gjithashtu se gjendja e tyre është stabile dhe pas trajtimit janë lëshuar në shtëpi. Nga të lënduarit, tre janë trajtuar prej plagëve prerëse.

“Deri më tani në Qendrën Emergjente, ndihmë mjekësore kanë kërkuar 12 persona, prej tyre një polic. Të gjithë kanë marë trajtimin e duhur dhe gjendja e tyre është stabile. Pas trajtimit të ofruar të gjithë janë lëshuar në shtëpi. Tetë prej të lënduarve janë trajtuar dhe nga ekipa e Klinikës së Oftalmologjisë për shkak të veprimit të lotsjellësit, kurse tre të tjerë plagë prerëse”, ka thënë Syla, në një përgjigje për Koha.net.

Disa deputetë të PDK-së kanë dalë në shesh ku po vazhdon të jetë e eskaluar situata. 

Njëri ndër ta edhe deputeti i PDK-së, Enver Hoxhaj, i cili për një moment iu është afruar policëve në shesh dhe e ka kërkuar komandantin e tyre.

“Ku është komandanti juaj?”, pyeti ai një polic.

Pastaj Hoxhaj u tha atyre që e kanë tepruar sonte me përdorimin e forcës.

“E keni tepru, dëgjo e keni tepru. Ku është komadanti. Kjo është sjellje e pajishme e keni tepru”, ka thënë ai.

Deputeti i Partisë Demokratike të Kosovës, Altin Krasniqi, i është bashkuar protestuesve që po qëndrojnë pranë Kuvendit të Kosovës.

Krasniqi ka thënë se zhvillimet e sotme nuk duhet të trajtohen si çështje partiake apo politike, por si një çështje që, sipas tij, prek të gjithë qytetarët.

“Kjo nuk është çështje politike, nuk është çështje e një partie, është çështje e një populli. Prandaj, nuk duhet të kthehet kjo çështje dhe të luftohet sot kjo protestë në këtë mënyrë kaq brutale ndaj qytetarëve”.

Ai ka kërkuar që çështja të adresohet në Kuvend, duke bërë thirrje që deputetët të kthehen në sallë dhe të votojnë ligjin.

“Duhet me qenë në Kuvend, mos me kthy në çështje politike, duhet me qenë në Kuvend, me votu ligjin dhe me procedu me çështje të tjera. Protestuesit po bëjnë një protestë të qetë, prandaj mendoj që në mënyrë proporcionale me qenë edhe përgjigja e policëve”, deklaroi ai.

Partia Demokratike e Kosovës, në një reagim, “dënon ashpër përdorimin e dhunës ndaj qytetarëve që po protestojnë për miratimin e ligjit që mbron UÇK-në. PDK kërkon nga Qeveria përgjegjësi të menjëhershme dhe nga organet shtetërore ndaljen e çdo veprimi joproporcional që po cenon rëndë të drejtën e qytetarëve për protestë”.

Tutje, në reagimin e PDK-së thuhet:

“Lufta e popullit të Kosovës, e udhëhequr nga UÇK-ja, ka qenë e drejtë, e pastër dhe e pashmangshme. UÇK-ja dhe lufta e saj çlirimtare janë pjesë e pandashme e historisë, identitetit dhe lirisë së Kosovës. Mbrojtja e kësaj trashëgimie është përgjegjësi qytetare dhe shtetërore që lidhet me të tashmen dhe të ardhmen e vendit.

PDK rithekson se nuk ka asnjë pengesë ligjore për miratimin e ligjit që mbron UÇK-në dhe përmbylljen e këtij procesi. Këtë e ka konfirmuar edhe vetë Qeveria në opinionin e saj. Prandaj, zvarritja e mëtejshme është e pajustifikueshme dhe përbën shpërfillje të drejtpërdrejtë të kërkesës së qytetarëve.

Qytetarët, fëmijët e dëshmorëve, invalidëve, veteranëve, po protestojnë me një kërkesë të qartë për një çështje jashtëzakonisht të rëndësishme për vendin. Zëri i tyre duhet të dëgjohet dhe të marrë përgjigje përmes veprimeve konkrete institucionale. Qeveria nuk mund ta zëvendësojë përgjegjësinë për vendimmarrje me përdorimin e forcës ndaj qytetarëve.

PDK kërkon nga organet shtetërore të ndalin dhunën ndaj protestuesve. Masat e përdorura ndaj një proteste që ka qenë e qetë për 20 ditë me radhë janë tërësisht joproporcionale dhe të papranueshme. Qëndresa e qytetarëve nuk mund të trajtohet si kërcënim dhe as të përdoret si pretekst për ushtrim dhune.

Është e papranueshme që institucionet e sigurisë po përdoren skajshmërisht për qëllime politike apo për ta shtypur me dhunë revoltën e arsyeshme të qytetarëve. Ato kanë për detyrë t’u shërbejnë qytetarëve dhe të mbrojnë të drejtat e tyre. Çdo përpjekje për t’i vënë në shërbim të interesave të pushtetit përbën abuzim të rëndë me përgjegjësinë shtetërore.

Asnjë urdhër politik nuk mund ta justifikojë dhunën ndaj qytetarëve që ushtrojnë të drejtën për protestë“.

PDK u bën thirrje të gjitha grupeve parlamentare dhe deputetëve që të veprojnë pa vonesë dhe ta përmbyllin miratimin e ligjit që mbron UÇK-në.

“Përgjegjësia institucionale në këtë moment kërkon vendimmarrje, respekt për qytetarët dhe mbrojtje të dinjitetit të çlirimtarëve“.

Deputeti i Lëvizjes Vetëvendosje, Artan Abrashi, i ka cilësuar të pakuptueshme kushtëzimet e Partisë Demokratike të Kosovës lidhur me votimin e Ligjit për Dhomat e Specializuara dhe çështjen e zgjedhjes së presidentit.

Abrashi ka thënë se LVV-ja asnjëherë nuk e ka lidhur çështjen e presidentit me votimin e ligjit.

“Kurrë ne nuk e kemi lidhur çështjen e presidentit me votimin e ligjit”, ka deklaruar Abrashi.

Sipas tij, çështja e presidentit është dërguar në Gjykatën Kushtetuese nga PDK-ja dhe afati për zgjedhjen e tij ka ardhur si rezultat i këtij procesi.

“Vetë PDK e dërgoi në Kushtetuese çështjen e presidentit dhe data na erdhi si na erdhi”, ka thënë ai.

Abrashi ka deklaruar se Ligji për Dhomat e Specializuara nuk ka qenë në rrezik dhe si dëshmi për këtë ka përmendur votimin e sotëm, ku projektligji mori 90 vota.

“Ligji asnjëherë nuk ka qenë në rrezik, e pamë sot se ligji i mori 90 vota, presidenti nuk i ka 80 vota”, është shprehur Abrashi.

Deputeti i LVV-së ka akuzuar PDK-në se po i manipulon ndjenjat e qytetarëve lidhur me këtë çështje.

“Mbrojtja e ish-krerëve të UÇK-së në apel kërkon angazhim institucional”, ka deklaruar Abrashi.

Deputeti i Partisë Demokratike të Kosovës, Uran Ismaili, ka reaguar lidhur me protestën që po zhvillohet pranë Kuvendit të Kosovës.

Në një deklaratë për Klan Kosovën, Ismaili u ka bërë thirrje pjesëtarëve të Policisë së Kosovës që, sipas tij, të mos ndjekin urdhra që mund të çojnë në përshkallëzim të situatës.

“Do t’i kisha lutur të gjithëve, po më së shumti policëve të Kosovës, që të mos bien në urdhrat e Qeverisë, e cila po kërkon që ta eskalojë situatë”, deklaroi ai.

Deputeti i PDK-së u shpreh se sipas tij, prapa zhvillimeve të fundit qëndron një urdhër politik nga kryeministri Albin Kurti.

“T’i ruajnë qytetarët, shumica e madhe e tyre po protestojnë në mënyrë të qetë dhe të mos provojnë situatën. Ky po shihet që është një urdhër politik i z.Kurti që ta eskalojë situatën”, u shpreh Ismaili.

Kryetari i Aleancës, Ardian Gjini, ka thënë se kryeministri i Kosovës, Albin Kurti, është i “vetmi politikan që me çdo qelizë të trurit e trupit të tij e ka dashur Gjykatën Speciale”.

Gjini në një postim në Facebook, ka thënë se mosvotimi i Speciales nga deputetët e Vetëvendosjes në vitin 2015 ka qenë “oportunizëm i pasur e jo biundje e ndonjë natyre”. Ai ka thënë se Specialja është thelbi i arsyes pse Kurti është në pushtet.

Gjini ka thënë se Kurti e ka programuar këtë kaos. Ai ka thënë se Kurti nga qershori e ka luajtur lojën e fajësimit.

“Në fakt, Gjykata Speciale është thelbi i arsyes se pse Kurti është në pushtet. Që prej qershorit, Aleanca iu ka paralajmëruar se Kurti do prapë zgjedhje. I ka mbyllur vet të gjitha opsionet për të dalur nga bllokada politike. Nuk e ka marrë parasysh ofertën e Aleancës, e ka poshtëruar me plot qëllim Lidhjen Demokratike dhe së fundi luajti me Partinë Demokratike. Përndryshe nuk do kishte pritur deri sot për ta votuar në parim ligjin. Do ta kishte bërë më herët. Përndryshe nuk do t’i fuste 22 projektligje në procedurë të përshpejtuar sot. Përndryshe nuk do ta kushtëzonte fare votimin e ligjit për Gjykatën Speciale me votimin e presidentit. Nëse vërtet dëshironte t’i shmangte zgjedhjet, ëin-ëin ka pasur. Por nuk deshi. Që prej qershorit lojën e fajësimit e ka luajtur. Mund t’iu them se iu kemi paralajmëruar. E tash? Shohim gaz lotsjellës e krisma në sheshin kryesor të kryeqytetit, kundër vlerave tona të lirisë. Po nesër? Vetëvendosje e pyet Gjykatën Kushtetuese nëse Albulena mund t’i shpallë zgjedhjet. Ky është kaos i programuar nga Kurti i cili nuk e do krijesën që e udhëheq, e që është Republika e pavarur e lirë dhe demokratike e Kosovës. Ky nuk i do as njerëzit që e duan e që e votojnë. Ndërsa, tjerët i urren. Por Kosova jonë nuk do të shkatërrohet. Do t’i mbijetojë edhe kësaj krize. Do ta mbijetojë edhe Kurtin dhe kastën e tij të keqbërësve”, ka shkruar Gjini në Facebook.

Deputetët e Lëvizjes Vetëvendosje kanë dalur nga objekti i Kuvendit të Kosovës, pasi Policia e Kosovës ka hedhur gaz lotsjellës për të larguar protestuesit që kishin rrethuar objektin.

Pasi nuk është arritur dakordim mes Vetëvendosjes dhe Partisë Demokratike të Kosovës për t’u mbajtur një seancë tjetër, deputetët e VV-së janë larguar nga Kuvendi ndërsa ata të PDK-së vazhdojnë të qëndrojnë.

Nga PDK-ja kanë thënë se është kushtëzuar votimi në lexim të dytë i ndryshimit të Ligjit për Dhomat e Specializuara me votimin e presidentit.

Të martën është afati i fundit për zgjedhjen e presidentit.

Policia e Kosovës ka thënë se përkundër kërkesave e thirrjeve të vazhdueshme që u ka bërë protestuesve që të respektohet ligji e të protestohet në mënyrë të qetë, zyrtarët policorë janë detyruar të përdorin gaz lotsjellës për të mundësuar daljen e deputetëve nga Kuvendi i Kosovës dhe për ta vënë situatën nën kontroll.

Policia ka thënë se janë shkaktuar dëme materiale, por nuk raportohet për ndonjë lëndim serioz të personave.

“Edhe përkundër kërkesave e thirrjeve të vazhdueshme nga Policia, për respektim të ligjit, për protestim në mënyrë të qetë, zyrtarët policorë janë detyruar të përdorin mjetet e ligjshme policore, gazin lotësjellës, për të mundësuar daljen e përsonaliteteve nga Kuvendi dhe për të vënë situatën nën kontroll. Si pasojë e hedhjes së gjësendeve të ndryshme, mjeteve piroteknike, fishekzjarreve, ndezjes së disa kontejnerëve të mbeturinave e zjarreve në rrugë nga protestuesit, janë shkaktuar dëme materiale, por fatmirësisht deri më tani nuk raportohet për ndonjë lëndim serioz të personave. Policia e Kosovës, e rithekson se njeh të drejtë e qytetarëve për protestim dhe shprehje të pakënaqësive në mënyrë të qetë dhe demokratike dhe vazhdon të apeloj te të gjithë pjesëmarrësit të protestojnë të qetë, të mos dëmtojnë pronën publike dhe të respektojnë ligjet. Përderisa protesta vazhdon, zyrtarët policorë do të jenë të pranishëm në terren për të garantuar rendin dhe sigurinë publike, siguria e qytetarëve dhe objekteve shtetërore si dhe mbarëvajtja e protestës vazhdojnë të jenë prioritet i Policisë së Kosovës”, thuhet në njoftimin e Policisë së Kosovës.

Kumtesa: 

Protesta e qytetarëve e cila po mbahej sot përreth objekteve shtetërore, Qeverisë dhe Kuvendit të Republikës së Kosovës, ka vazhduar edhe në orët e mbrëmjes.

Policia e Kosovës, me njësitë e saja ka vazhduar me ndërmarrjen e masave të nevojshme policore për ofrimin e sigurisë, ruajtjen e rendit e qetësisë publike, mbarëvajtjen e protestës si dhe ruajtjen e jetës dhe pronës publike.

Përderisa protesta vazhdonte të mbahej pranë objekteve shtetërore, një grup i caktuar i personave në protestë, në shenjë pakënaqësie për mos votimin e ligjit për Specialen, në vazhdimësi kanë hedhur gjësende të ndryshme, mjete piroteknike e fishekzjarre drejt objekteve shtetërore, për të pamundësuar daljen e personaliteteve/deputetëve nga Kuvendi i RKS-së, ku disa prej tyre edhe i kanë detyruar të kthehen sërish brenda në Kuvend.

Policia e Kosovës, me qëllim të ruajtjes së rendit dhe sigurisë publike, ofrimit të sigurisë për qytetarët si dhe mbrojtjes së pronës publike, në vazhdimësi ka kërkuar nga pjesëmarrësit që të protestojnë në mënyrë të qetë dhe të mos dëmtojnë pronën publike, të mos pengojnë lirinë e lëvizjes së lirë, e të mos bien ndesh me ligjin.

Referuar zhvillimeve dhe situatës së krijuar nga hedhjet e vazhdueshme të gjësendeve të ndryshme, mjeteve piroteknike e fishekzjarreve, moslejimit të lëvizjes së lirë, zyrtarët policorë janë detyruar të ndërmarrin masat e nevojshme dhe të domosdoshme, për parandalimin e dëmtimit të objekteve shtetërore dhe krijimit të mundësive për lëvizje e qarkullim të lirë të qytetarëve e personaliteteve shtetërore.

Edhe përkundër kërkesave e thirrjeve të vazhdueshme nga Policia, për respektim të ligjit, për protestim në mënyrë të qetë, zyrtarët policorë janë detyruar të përdorin mjetet e ligjshme policore, gazin lotësjellës, për të mundësuar daljen e përsonaliteteve nga Kuvendi dhe për të vënë situatën nën kontroll.

Si pasojë e hedhjes së gjësendeve të ndryshme, mjeteve piroteknike, fishekzjarreve, ndezjes së disa kontejnerëve të mbeturinave e zjarreve në rrugë nga protestuesit, janë shkaktuar dëme materiale, por fatmirësisht deri më tani nuk raportohet për ndonjë lëndim serioz të personave.

Policia e Kosovës, e rithekson se njeh të drejtë e qytetarëve për protestim dhe shprehje të pakënaqësive në mënyrë të qetë dhe demokratike dhe vazhdon të apeloj te të gjithë pjesëmarrësit të protestojnë të qetë, të mos dëmtojnë pronën publike dhe të respektojnë ligjet.

Përderisa protesta vazhdon, zyrtarët policorë do të jenë të pranishëm në terren për të garantuar rendin dhe sigurinë publike, siguria e qytetarëve dhe objekteve shtetërore si dhe mbarëvajtja e protestës vazhdojnë të jenë prioritet i Policisë së Kosovës.

Deputeti i Partisë Demokratike të Kosovës, Arian Tahiri në një konferencë për media me nënkryetaren e Kuvendit, Vlora Çitaku ka ftuar deputetët që të vijnë dhe të votojnë ndryshimet në Ligjin për Specialen edhe në lexim të dytë në orët sa kanë mbetur para se të shpërbëhet kjo legjislaturë.

Ai ka thënë se është obligim dhe përgjegjësi e çdo force politike të votohen ndryshimet e këtij Ligji.

“Është obligim dhe përgjegjësi kombëtare e secilës forcë politike dhe secilit deputet të Kuvendit të Kosovës, të vijë në Kuvend në këto orë sa kanë mbetur para se të shpërbëhet Kuvendi dhe të miratohet Ligji për Specialen edhe në lexim të dytë”, ka thënë Tahiri.

Edhe Çitaku ka thënë se po kërkojnë që Ligji të miratohet pa asnjë kusht. Sipas Çitakut, në takim votimi i këtij Ligji është kushtëzuar me votimin e presidentit nga Lëvizja Vetëvendosje.

“Ne kërkojmë që Ligji të miratohet pa asnjë kusht. Janë procese të ndara. Si mund të kushtëzosh mbrojtjen e UÇK-së. Është papërgjegjësi politike, historike e kombëtare. Kemi edhe pak orë kohë. Do të jemi këtu. Nuk lëvizim. Shpresojmë të ketë reflektim edhe nga subjektet tjera politike, përkatësisht nga Albin Kurti e Lëvizja Vetëvendosje”, ka thënë Çitaku.

Ka dështuar të arrihet një marrëveshje mes PDK-së dhe Vetëvendosjes për të votuar në lexim të dytë ndryshimin e Ligjit për Dhomat e Specializuara.

Deputetët të Vetëvendosjes janë parë duke dal prej objektit nga dalja nga Qeveria. Ndërsa policia ka hedhur gaz lotsjellës në atë dalje.

Sipas PDK-së takimi ka dështuar pasi kryeministri Albin Kurti ka kushtëzuar votimin e ndryshimeve të Ligjit në lexim të dytë, me zgjedhjen e presidentit.

Protestues janë mbledhur rreth Kuvendit duke mos lejuar deputetët të largohen.

Xhafer Gashi ka dhënë dorëheqje nga të gjitha pozitat në Lidhjen Demokratike të Kosovës pasi kjo parti gjatë ditës së sotme nuk i votoi në lexim të parë ndryshimet në Ligjin për Gjykatën Speciale.

Gashi ka thënë se nuk mund t’i mbaj këto pozita kur qëndrimi për këtë çështje bie ndesh me përgjegjësinë që ndjen ndaj njerëzve që përfaqëson.

Ai ka thënë se ka dhënë dorëheqje nga pozitat si: Anëtar i Këshillit të Përgjithshëm, Anëtar i Kryesisë dhe kryetar i degës së LDK-së në Obiliq.

“Sot duhet ta vendosim atdheun përpara vetes dhe interesave të ngushta partiake. Nuk mund t’i mbaj pozitat e mia në parti kur qëndrimi i saj për këtë çështje bie ndesh me ndërgjegjen time dhe me përgjegjësinë që ndiej ndaj njerëzve që përfaqësoj. Heshtja ime do të rëndonte më shumë se largimi. Prandaj, jap dorëheqje të parevokueshme nga të gjitha pozitat e mia në Lidhjen Demokratike të Kosovës: Anëtar i Këshillit të Përgjithshëm; Anëtar i Kryesisë; Kryetar i Degës së LDK-së në Obiliq”, ka thënë Gashi në njoftimin e tij në Facebook në lidhje me këtë çështje.

Njoftimi i plotë: 

ATDHEU PËRPARA VETES
Të dashur anëtarë të Lidhjes Demokratike të Kosovës,
Të nderuar qytetarë të Obiliqit dhe të Kosovës,
Së bashku me grupin e asamblistëve të LDK-së ju njoftojmë se;

Ka çaste kur njeriu duhet të ndalet përballë ndërgjegjes së vet dhe të vendosë çfarë do të mbajë me vete: pozitën apo besnikërinë ndaj idealit që ia ka prirë jetës. Sot, për mua, është një çast i tillë.

Mosvotimi nga LDK-ja i ligjit për ndryshimin e Ligjit për Dhomat e Specializuara ka shkaktuar indinjatë të thellë tek anëtarësia e Degës së LDK-së në Obiliq, përfshirë grupin tonë të asambleistëve. Këtë dhimbje dhe indinjatë e ndaj edhe unë. Si kryetar i Degës, e ndiej për detyrë t’i përgjigjem me qëndrim të qartë dhe me përgjegjësi personale.

Rrugëtimi im për lirinë e Kosovës nisi në vitet e veprimtarisë ilegale, kur fjala për liri thuhej me rrezik dhe dashuria për atdheun sprovohej me përndjekje. Ideali që mishëronin Fahri Fazliu dhe Afrim Zhitia mbetet i gjallë në ndërgjegjen time. Emrat e tyre na kujtojnë çmimin që paguan njerëzit tanë që Kosova të mund të merrte frymë e lirë.

Në luftë, pranë ministrit të Mbrojtjes, Ahmet Krasniqi, dhe më pas si pjesëtar i Komandës së Përparuar, Grupit Operativ III dhe Brigadës 138 “Agim Ramadani”, bashkë me Rrustem Berishën, Agim Ramadanin, Sali Çekajn, Anton Qunin, Xhemajl Fetahajn dhe bashkëluftëtarë të tjerë, përgjegjësia ndaj atdheut mori peshën e jetës. Në ato ditë, kur nuk e dinim nëse do ta shihnim agimin tjetër, besonim se sakrifica jonë do t’u hapte rrugë brezave që do të vinin.

Sot, sa herë shoh të rinjtë e lindur në Kosovën e lirë, kujtoj ata që nuk u kthyen për ta parë këtë ditë. Kujtoj familjet që ende ruajnë një fotografi, një kujtim dhe një mungesë që nuk mbushet. Përballë tyre, çdo pozitë që mbajmë na ngarkon me detyrimin për të qenë të denjë për besimin dhe sakrificën e tyre.

Këtë përgjegjësi jam përpjekur ta mbaj edhe në paqe, gjatë shërbimit institucional dhe viteve të drejtimit të Komunës së Obiliqit. Besimi i qytetarëve më ka dhënë forcë, por edhe më ka kujtuar gjithmonë se detyra publike ka kuptim vetëm kur i shërben vendit dhe njerëzve të tij.

Për mua, mbrojtja e dinjitetit të luftës çlirimtare dhe kërkesa për drejtësi janë përgjegjësi që tejkalojnë kufijtë partiakë. Në një çështje kaq të rëndësishme për Kosovën, përfaqësuesit tanë duhet ta dëgjojnë zërin e qytetarëve dhe ta ndiejnë peshën e shqetësimit të tyre.

Ky qëndrim nuk e përjashton dhe as e zbeh bindjen dhe besimin tim se drejtësia duhet të ngadhënjejë. Secili duhet të mbajë përgjegjësi personale për veprimet e veta, për të kaluarën dhe për të ardhmen. Përgjegjësia duhet të përcaktohet individualisht, mbi prova dhe në një proces të paanshëm, e jo në një proces ndaj të cilit janë bërë publike aq shumë dyshime të bazuara se është një proces politik, i drejtuar tërësisht kundër UÇK-së dhe vlerave që ajo përfaqëson për lirinë e vendit tonë.

Sot duhet ta vendosim atdheun përpara vetes dhe interesave të ngushta partiake. Nuk mund t’i mbaj pozitat e mia në parti kur qëndrimi i saj për këtë çështje bie ndesh me ndërgjegjen time dhe me përgjegjësinë që ndiej ndaj njerëzve që përfaqësoj. Heshtja ime do të rëndonte më shumë se largimi.

Prandaj, jap dorëheqje të parevokueshme nga të gjitha pozitat e mia në Lidhjen Demokratike të Kosovës:
– Anëtar i Këshillit të Përgjithshëm;
– Anëtar i Kryesisë;
– Kryetar i Degës së LDK-së në Obiliq.

Këtë vendim e marr personalisht, me vetëdije dhe përgjegjësi të plotë. Secili bashkëpunëtor dhe anëtar i Degës ka të drejtën të vendosë sipas ndërgjegjes së vet.

Falënderoj familjen time, që ka ndarë me mua barrën e mungesave, shqetësimeve dhe sakrificave ndër vite. Mbështetja e saj më ka mbajtur në këmbë në ditët më të vështira dhe më jep forcë edhe sot.

Falënderoj anëtarësinë e Degës së LDK-së në Obiliq, asambleistët, bashkëpunëtorët dhe të gjithë qytetarët për besimin dhe përkrahjen. Vitet e punës sonë të përbashkët dhe lidhjet njerëzore të ndërtuara gjatë tyre do të mbeten të çmuara për mua.

Me mirënjohje të veçantë u drejtohem qytetarëve që kanë mbështetur dhe vazhdojnë ta mbështesin këtë kauzë përmes protestave paqësore dhe vigjileve para Kuvendit të Republikës së Kosovës. Në qëndresën tuaj ka dhimbje, dinjitet dhe besnikëri ndaj kujtesës sonë. Zëri juaj meriton të dëgjohet brenda atyre mureve që sot qëndrojnë në një Kosovë të lirë.

Do të vazhdoj t’i shërbej vendit tim dhe të qëndroj pranë qytetarëve, bashkëluftëtarëve dhe familjeve që mbajnë peshën e sakrificës për liri.

Pozitat mund t’i lëmë. Përgjegjësinë ndaj atdheut e mbajmë gjithë jetën.
Me respekt,
Xhafer Gashi

Ka eskaluar protesta në Prishtinë, ku po kërkohet të kalohet ndryshim-ligji për Gjykatën Speciale.

Policia e Kosovës ka përdorur gaz lotsjellës, ndërkaq janë parë edhe kontejnerë të djegur.

Disa protestues kanë pasur nevojë për ndihmë mjekësore pas hedhjes së gazit lotsjellës.

Endrit Thaçi, djali i ish-presidentit Hashim Thaçi, dhe Klestor Veseli, djali i ish-kryeparlamentarit Kadri Veseli, i janë bashkuar protestuesve që po qëndrojnë në shesh, në kohën kur situata përreth Kuvendit të Kosovës vazhdon të jetë e tensionuar.

Dy djemtë e ish-krerëve të UÇK-së janë parë mes qytetarëve, të cilët po kërkojnë miratimin e ndryshimeve në Ligjin për Dhomat e Specializuara.

Protesta është zhvilluar paralelisht me zhvillimet në Kuvend, ku partitë politike nuk kanë arritur pajtim për votimin e ndryshimeve ligjore. Ndërkohë, Policia e Kosovës ka ndërhyrë jashtë objektit për shpërndarjen e protestuesve.

Në një konferencë për media, deputeti i Partisë Demokratike të Kosovës, Arian Tahiri, së bashku me nënkryetaren e Kuvendit, Vlora Çitaku, u ka bërë thirrje deputetëve që të kthehen në Kuvend dhe të votojnë ndryshimet në Ligjin për Dhomat e Specializuara në lexim të dytë.

Tahiri ka deklaruar se votimi i këtij ligji është përgjegjësi e të gjitha forcave politike dhe deputetëve, veçanërisht në orët e fundit para përfundimit të mandatit të kësaj legjislature.

“Është obligim dhe përgjegjësi kombëtare e secilës forcë politike dhe secilit deputet të Kuvendit të Kosovës, të vijë në Kuvend në këto orë sa kanë mbetur para se të shpërbëhet Kuvendi dhe të miratohet Ligji për Specialen edhe në lexim të dytë”, ka thënë Tahiri.

Ndërkaq, Çitaku ka deklaruar se kërkesa e PDK-së është që ndryshimet ligjore të miratohen pa kushte.

Sipas saj, gjatë diskutimeve politike, Lëvizja Vetëvendosje e ka kushtëzuar votimin e ndryshimeve në Ligjin për Dhomat e Specializuara me votimin për presidentin e vendit.

Çitaku ka kërkuar që deputetët të votojnë ligjin, duke theksuar se çështja nuk duhet të lidhet me marrëveshje të tjera politike.

Zhvillimet rreth Kuvendit dhe protesta jashtë tij vijojnë, ndërsa mbetet në pikëpyetje nëse ndryshimet në Ligjin për Dhomat e Specializuara do të arrijnë të miratohen para përfundimit të kësaj legjislature.

Policia e Kosovës ka filluar të hedh gaz lotsjellës drejt protestuesve pasi të njëjtit kanë bllokuar hyrjet e Kuvendit të Kosovës, për të mos lejuar deputetët që dalin nga ky institucion.

Paraprakisht, Çlirim Haziri njëri nga organizatorët e protestave, ka thënë se zyrtarët policorë po i nënshtrohen Albin Kurtit. Ai ka përsëritur se deputetët do të dalin nga Kuvendi vetëm “mbi trupat e tyre”. Ndërkohë është shtuar numri i forcave të policisë.

Protesta po vazhdon me thirrjet që të votohen ndryshimet në Ligjin për Specialen, derisa është parë shtimi i forcave policore.

Policia ka hedhur lotsjellës nga, përfshirë nga hyrja në drejtim të rrugës “Agim Ramadani” në tentim për ta liruar rrugën për largimin e deputetëve. Protestuesit kanë vazhduar hedhjen e mjeteve piroteknike. Ata kanë vendosur rrethoja të hekurit nga ajo rrugë. Janë djegur edhe shportat e bërrlokut të cilat janë vendosur në rrugë. Në vendin e ngjarjes është parë edhe autoambulanca.

Gjatë ditës protestuesit kanë hedhur edhe mjete piroteknike drejt Kuvendit me ç’rast kanë thyer xhamat. Protestuesit me dhunë kanë kapur edhe deputetin e Lëvizjes Vetëvendosje, Fahrush Rexhepi dhe e kanë kthyer drejt Kuvendit.

Gjithashtu dhunshëm e kanë kapur edhe ish-zëvendëskryeministrin e Kosovës, Besnik Bislimi drejt Qeverisë së Kosovës. Ai më pas, bashkë më zyrtarët policorë që po e mbronin u sulmua edhe me ujë nga protestuesit.

Deputetja e Partisë Demokratike të Kosovës, Vlora Çitaku, e ka ftuar kryeministrin Albin Kurti që të shkojë në Kuvend dhe ta votojë ligjin për Gjykatën Speciale.

Ajo në një postim në Facebook, ka thënë se qytetarët po presin vepra dhe jo fjalë.

Reagimi i saj i plotë:

“Albin, Eja në seancë. Eja në Kuvend. Eja dhe votojeni ligjin. Jo për PDK-në. Jo për një parti. Por për UÇK-në. Për historinë. Për të ardhmen. E kemi detyrë politike, qytetare e kombëtare. Qytetarët po presin nga ne vepra, jo fjalë“.

Asambleistja e LDK-së në Kuvendin Komunal të Obiliqit, Vlora Mjekiqi Kabashi, ka dhënë dorëheqje të parevokueshme nga të gjitha detyrat dhe funksionet në këtë parti.

Ajo ka bërë të ditur se nga sot mandatin në Kuvendin Komunal të Obiliqit do ta vazhdojë si asambleiste e pavarur.

Mjekiqi Kabashi ka thënë se deri më tani ka qenë edhe kryetare e Forumit të Gruas në LDK-në e Obiliqit, si dhe delegate në Kuvendin Zgjedhor të LDK-së.

Ajo e ka lidhur dorëheqjen me qëndrimin e LDK-së për çështjen e UÇK-së dhe zhvillimet rreth Dhomave të Specializuara.

“E vetëdijshme se Lufta e UÇK-së ishte luftë për liri, e mbështetur edhe nga SHBA dhe NATO-ja, dhe e bindur se liria është më shumë se çdo përkatësi partiake, pasi LDK-ja nuk e mbështeti këtë parim themelor se liria është mbi çdo parti, jap dorëheqje të parevokueshme nga të gjitha detyrat dhe funksionet që kam në LDK”, ka shkruar ajo.

Mjekiqi Kabashi ka falënderuar qytetarët e Obiliqit për besimin e dhënë, derisa ka njoftuar se do të vazhdojë si asambleiste e pavarur.

Gjatë ditës edhe ssambleisti i LDK-së në Obiliq ka dhënë dorëheqje nga partia.

Asambleisti i LDK-së në Kuvendin Komunal të Obiliqit, Labinot A. Mirena, ka dhënë dorëheqje të parevokueshme nga të gjitha strukturat e Lidhjes Demokratike të Kosovës.

Ai ka thënë se vendimi i tij lidhet me mospajtimin ndaj qëndrimit të LDK-së për krerët e UÇK-së që po gjykohen në Hagë.

“Prandaj, nga sot mandatin tim në Kuvendin Komunal të Obiliqit do ta vazhdoj si asambleist i pavarur, me qëndrime të qarta dhe me përgjegjësi para qytetarëve të Obiliqit që më kanë dhënë besimin për t’i përfaqësuar”, ka deklaruar ai.

Deputetët e LDK-së nuk kanë marrë pjesë sot në votimin për Projektligjin për Speciale.

Lidhja Demokratike e Kosovës (LDK), ka reaguar pasi thotë se i janë vendosur emrat e deputeteve të saj në një rresht me deputetët e Listës Serbe.

Në reagim thuhet nuk shantazhohet me etiketime dhe kërcënime.

Tutje në reagim thuhet se janë partia e Ibrahim Rugovës dhe veprimtarëve të vrarë.

LDK ka shtuar se Lufta e UÇK-së është e shenjtë, ndërsa kërkimi i drejtësisë për viktimat është detyrim i patjetërsueshëm.

Komunikata e plotë:

REAGIM I LIDHJES DEMOKRATIKE TË KOSOVËS

Vendosja e emrave të deputetëve të LDK-së në një rresht me deputetët e Listës Serbe, për shkak të qëndrimit tonë parimor, logjik e shtetar, është përpjekje e ulët për linçim publik dhe kërcënim politik.

Mesazhi ynë është i qartë, LDK nuk shantazhohet. As me etiketime, as me kërcënime, as me përpjekje të tilla.

Qëndrimi ynë buron nga përgjegjësia ndaj Kosovës. Ne nuk e mashtrojmë popullin me iniciativa që nuk prodhojnë efektin juridik që u premtohet qytetarëve. Nuk ushqejmë shpresa të rreme dhe nuk i përdorim dhimbjen e ndjenjat e njerëzve për përfitime politike. Çështje kaq të ndjeshme kërkojnë seriozitet juridik dhe koordinim me aleatët tanë.

Po aq qartë, LDK nuk e braktis identitetin e vet ekzistencial. Jemi partia e Ibrahim Rugovës, e lirisë, e pavarësisë dhe e orientimit perëndimor të Kosovës. Jemi edhe partia e veprimtarëve të vrarë, familjet e të cilëve ende presin drejtësi. Askush nuk mund të na kërkojë ta harrojmë këtë pjesë të historisë sonë, aq më pak të na kërcënojë pse kërkojmë drejtësi.

Lufta e UÇK-së është e shenjtë. Kërkimi i drejtësisë për viktimat është detyrim i patjetërsueshëm. Kosova duhet t’i mbrojë të dyja, me të vërtetën, me shtetin dhe me përgjegjësi.

LDK-së nuk i caktohet qëndrimi me shantazh. Dhe nuk i merret identiteti me kërcënim.

U bëjmë thirrje të gjitha partive politike dhe udhëheqësve të tyre të tregojnë përgjegjësi dhe të kërkojnë përgjegjësi nga përfaqësuesit e përkrahësit e tyre. Të ndalin gjuhën e linçimit dhe të mos e kthejnë këtë çështje në betejë kundër njëri-tjetrit. Dallimet për rrugën që duhet ndjekur nuk na bëjnë armiq. Kosova ka nevojë për maturi dhe bashkëpunim; nxitja e urrejtjes mes nesh vetëm e dobëson atë.

“Votoma Presidentin, ta votoj ligjin”, kështu ka deklaruar deputetja e PDK-së, Blerta Deliu, pasi ka përfunduar takimi mes Albin Kurtit dhe Bedri Hamzën.

Ajo tha se nuk ka shprehje më të qartë të pazarit me kauzën e çlirimtarëve.

“Votoma Presidentin, ta votoj ligjin”, a ka shprehje ma të qartë të pazarit me kauzën e çlirimtarëve? Po thoni se UÇK-ja është e të gjithëve. Atëherë pse vota juaj për ligjin varet prej asaj çka merrni për vete? Nëse UÇK-ja është e të gjithëve, edhe përgjegjësia është e të gjithëve. Votojeni ligjin pa ia vu çmimin”, ka shkruar ajo në Facebook.

Pas përfundimit të takimit me kryeministrin Albin Kurti, kryetari i PDK-së, siç merr vesh Gazeta Online Reporteri.net, Bedri Hamza, ka mbledhur Grupin Parlamentar të Partisë Demokratike të Kosovës.

Takimi i Grupit Parlamentar vjen menjëherë pas bisedës që Hamza zhvilloi me Kurtin në ambientet e Kuvendit, e cila zgjati më shumë se një orë.

Në takimin mes Kurtit dhe Hamzës janë diskutuar dy çështjet që kanë dominuar zhvillimet politike të ditëve të fundit: ndryshimi i Ligjit për Dhomat e Specializuara dhe zgjedhja e presidentit të Kosovës.

PDK-ja ka insistuar që Projektligji për ndryshimin e Ligjit për Dhomat e Specializuara të miratohet në të dyja leximet, ndërsa më pas të procedohet me zgjedhjen e presidentit.

Ende nuk ka informacione për përmbajtjen e bisedës mes Kurtit dhe Hamzës apo nëse është arritur ndonjë pajtim.

Tashmë mbetet të shihet se çfarë qëndrimi do të marrë Grupi Parlamentar i PDK-së pas takimit të kryetarit të partisë me Kurtin.

Ka përfunduar takimi ndërmjet kryeministrit Albin Kurti dhe kryetarit të PDK-së, Bedri Hamza, i cili kishte nisur në orën 16:40 në ambientet e Kuvendit të Kosovës mëson Gazeta Online Reporteri.net.

Takimi ka zgjatur më shumë se një orë dhe është zhvilluar në përpjekje për të arritur një marrëveshje politike për ndryshimin e Ligjit për Dhomat e Specializuara dhe zgjedhjen e presidentit të Kosovës.

Takimi i sotëm erdhi pasi Kuvendi votoi në lexim të parë Projektligjin për ndryshimin e Ligjit për Dhomat e Specializuara.

Kurti dhe Hamza kanë zhvilluar disa takime gjatë ditëve të fundit pikërisht për këto dy çështje.

Hamza ka insistuar që ndryshimet në Ligjin për Specialen të miratohen në tërësi, përfshirë leximin e dytë, përpara se PDK-ja të japë votat për zgjedhjen e presidentit.

“Ne po themi me u aprovu ligji në dy leximet, pastaj me u propozu emri për president dhe me u zgjedhë presidenti e me u shmang zgjedhjet”, kishte deklaruar Hamza.

Ende nuk është bërë e ditur nëse nga takimi i sotëm është arritur ndonjë marrëveshje mes Kurtit dhe Hamzës.

Drejtori i përgjithshëm i Policisë, Gazmend Hoxha, i ka kapërcyer me vrull dy rrethojat te Kuvendi.

Ai e frikësoi disi një një polic brenda oborrit të Kuvendit, i cili u befasua pak kur e pa se ishte shefi i tij.

Hoxha më herët u pa duke hyrë në Qeveri, prapa një kordoni policësh të vendosur në hyrje.

Protestuesit e grumbulluar përreth Kuvendit dhe Qeverisë kanë paralajmëruar se nuk do t’i lënë zyrtarët shtetërorë dhe deputetët të dalin nga aty derisa të votohet edhe në lexim të dytë projektligji për Gjykatën Speciale.

Shefja e deputetëve të Lëvizjes Vetëvendosje, Arbërie Nagavci, ka reaguar pas incidentit me deputetin Fahrush Rexhepi, i cili u pengua nga protestuesit të largohej nga hapësirat e Kuvendit.

Sipas pamjeve të publikuara ku disa protestues e kanë kapur Rexhepin dhe e kanë ngritur për ta kthyer sërish brenda rrethojave të Kuvendit, duke mos e lejuar të vazhdojë largimin.

Nagavci e ka dënuar këtë veprim, duke thënë se protesta dhe kritika janë të drejta, por jo përdorimi i forcës ndaj një deputeti.

“E papranueshme dhe e turpshme sjellja e sotme ndaj deputetit të Lëvizjes VETËVENDOSJE!, Prof. Dr. Fahrush Rexhepi.

Pamjet ku protestuesit e kapin për duarsh dhe e shtyjnë me forcë një deputet të Republikës së Kosovës nuk kanë asgjë të përbashkët me të drejtën demokratike për protestë. Protesta është e drejtë, kritika është e drejtë, kërkesa për llogaridhënie është e drejtë, por askush nuk ka të drejtë të përdorë forcën fizike ndaj një përfaqësuesi të zgjedhur të qytetarëve”, ka shkruar Nagavci.

Ajo ka përmendur edhe familjen e Rexhepit, duke theksuar se vëllai i tij, Njazi Rexhepi, ishte pjesëtar i Brigadës 138 “Agim Ramadani” dhe ra në Betejën e Koshares, ndërsa vëllai tjetër, Jonuz Rexhepi, është veteran i luftës dhe pjesëtar i UÇK-së.

“Askush nuk fiton të drejtën të ushtrojë dhunë duke u thirrur në emër të UÇK-së, aq më pak ndaj një njeriu, familja e të cilit ka paguar me gjak çmimin e lirisë së Kosovës.

Liria për të cilën ranë dëshmorët nuk u fitua që sot, në emër të saj, të kapen me forcë deputetët e Republikës.

Kjo nuk është mbrojtje e vlerave të luftës.

Kjo është cenim i tyre”, ka shkruar Nagavci.

Deputeti i Aleancës, Besnik Tahiri, ka kërkuar që deputetët e Lëvizjes Vetëvendosje të paraqiten sa më shpejt në sallën e Kuvendit, në mënyrë që të mbahet seanca për leximin e dytë të Projektligjit për Dhomat e Specializuara.

Tahiri, në një konferencë për media, tha se Projektligji duhet të sillet menjëherë në Kuvend, duke theksuar se, sipas tij, nuk ka arsye që kjo të mos ndodhë.

“Ligji duhet të vijë menjëherë. Aleanca kërkon menjëherë me e sjellë. Nuk ka asnjë arsyetim pse të mos vijë ligji”, tha Tahiri.

Ai u shpreh se Aleanca po e përcjell me shqetësim situatën në Kuvend dhe zhvillimet jashtë objektit të tij.

“Ne po e përcjellim me shqetësim situatën e cila është në Kuvend të Kosovës dhe jashtë Kuvendit”, deklaroi Tahiri.

Deputetja e PDK-së, Ganimete Musliu, u ka bërë thirrje qytetarëve që po protestojnë në mbështetje të ish-krerëve të UÇK-së që të vazhdojnë protestat dhe t’u bashkohen organizatorëve, në mënyrë që të kërkohet miratimi i Ligjit për Dhomat e Specializuara.

Musliu, përmes një videoje të publikuar nga Kuvendi, ka thënë se deputetët e PDK-së po qëndrojnë në sallën e Kuvendit me të njëjtin qëllim si protestuesit në rrugë.

“Të dashur qytetarë të Republikës së Kosovës, ashtu siç po qëndroni ju tash e tri javë ditë në rrugët e Kosovës e në metropolet e botës, ashtu po qëndrojmë edhe ne në sallën e Kuvendit të Republikës së Kosovës me të vetmen kërkesë dhe të vetmin qëllim: për të votuar ligjin për dhomat e specializuara të Kosovës.

Ne e dimë që jemi pak, jemi vetëm 22 deputetë, por sa më shumë që ju jeni në rrugë, aq më të fortë do të bëhemi ne brenda sallës.

Prandaj, ju ftojmë për përkrahje, ju ftojmë t’ju bashkangjiteni organizatorëve të protestës dhe një zëri të kërkojmë të drejtën tonë për të mbrojtur luftën e lavdishme të ushtrisë çlirimtare të Kosovës”, ka thënë Musliu.

Organizatori i protestës “Jo në emrin tim!” Çlirim Haziri ka bërë thirrje për një mobilizim qytetar para Kuvendit të Kosovës, duke kërkuar pjesëmarrje masive në mbështetje të Ushtrisë Çlirimtare të Kosovës.

Në një mesazh të publikuar në Facebook, Haziri u është drejtuar qytetarëve me thirrjen që të mblidhen në shesh dhe të jenë të pranishëm pranë Kuvendit.

“Thirrje gjithëpopullore! Ejani të gjithë te Kuvendi i Kosovës! UÇK-ja ka nevojë për ne. Tani!”, ka shkruar Haziri.

Ai ka theksuar se, sipas tij, “sot nuk ka vend për heshtje” dhe ka bërë thirrje për bashkim e pjesëmarrje.

“Të gjithë në shesh! O sot, o kurrë! Për UÇK-në. Për drejtësi. Ejani tani!”.

Altin Krasniqi, djali i ish-kryeparlamentarit të Kosovës dhe njërit prej ish-krerëve të UÇK-së, Jakup Krasniqit u ka bërë thirrje deputetëve që të shkojnë në Kuvend dhe siç u shpreh “të bashkohemi përderi rreth UÇK-së”.

Në fund të mesazhit të tij, ai iu drejtua edhe qytetarëve me një përshëndetje të veçantë.

“I ftoj të gjithë kolegët deputetë, nga të gjitha partitë, të vijnë në Kuvend që të bashkohemi përsëri rreth UÇK-së, si dikur, e t’i mbrojmë me dinjitet çlirimtarët tanë dhe Kosovën. Qytetarë, të fala keni nga babi”, shkroi ai.

Deputetja e PDK-së, Vlora Çitaku tha se si parti do të qëndrojnë në sallën plenare derisa të miratohet në lexim të dytë projektligji që parasheh ndryshimin e ligjit për Dhomat e Specializuara dhe Zyrën e Prokurorit të Specializuar.

“PDK-ja nuk largohet nga salla, nuk largohet nga Kuvendi”, tha ajo.

Çitaku u ka bërë thirrje partive të tjera politike që të marrin pjesë në seancë, në mënyrë që ligji të votohet në lexim të dytë.

“I ftojmë të gjithë deputetët të kthehen në sallë dhe të votojnë në lexim të dytë Ligjin për Dhomat e Specializuara. Çështja e ligjit dhe çështja e presidentit janë të ndara. Votimi i ligjit është detyrim jo vetëm politik, por edhe kombëtar. Çështja e presidentit është çështje e marrëveshjes, janë totalisht të ndara”, tha ajo.