Gjermania ka akuzuar Rusinë për një sulm kibernetik ndaj kontrollit të trafikut ajror dhe përpjekje për ndërhyrje në zgjedhje, dhe ka thirrur ambasadorin rus.

Një zëdhënës i ministrisë së jashtme tha se inteligjenca ushtarake ruse qëndronte pas një “sulmi kibernetik kundër kontrollit të trafikut ajror në Gjermani në gusht 2024”.

Zëdhënësi akuzoi gjithashtu Rusinë për përpjekje për të ndikuar dhe destabilizuar zgjedhjet federale të vendit në shkurt të këtij viti.

Reklamë

Ai tha se Gjermania, në bashkërendim të ngushtë me partnerët e saj evropianë, do të përgjigjej me kundërmasa për ta bërë Rusinë “të paguajë një çmim për veprimet e saj hibride”.

Nuk pati reagim të menjëhershëm nga Rusia, raporton BBC.

Zëdhënësi tha se sulmi kibernetik i gushtit 2024 mund t’i atribuohej grupit rus të hakerëve Fancy Bear.

“Gjetjet tona të inteligjencës dëshmojnë se shërbimi i inteligjencës ushtarake ruse GRU mban përgjegjësi për këtë sulm,” shtoi ai.

Ministria vazhdoi duke thënë se tashmë ishte e sigurt se Moska kishte tentuar të “ndikonte dhe destabilizonte si zgjedhjet e fundit federale ashtu edhe punët e brendshme të Republikës Federale të Gjermanisë” përmes një fushate dezinformimi të quajtur Storm 1516.

Reklamë

Fushata, u tha, ishte fokusuar pjesërisht te kandidati kryesor i Partisë së Gjelbër, Robert Habeck dhe kandidati kryesor i CDU-së, Friedrich Merz, i cili tani është kancelar.

Qeveria gjermane tha se agjencitë e sigurisë kishin identifikuar video të rreme që pretendonin manipulim votash si pjesë e një përpjekjeje ruse për dezinformim vetëm disa ditë para zgjedhjeve.

Thuhet se Fancy Bear ka publikuar më parë të dhëna të Agjencisë Botërore Antidoping dhe ka luajtur një rol kyç në sulmin kibernetik të vitit 2016 ndaj Komitetit Kombëtar Demokratik të SHBA-së, sipas ekspertëve të sigurisë.

Akuza e fundit vjen mes shqetësimeve të shtuara në Evropë për sulmet kibernetike të dyshuara ruse që nga fillimi i pushtimit të Ukrainës nga Rusia në vitin 2022.

Reklamë

Ndërsa ende nuk i është përgjigjur akuzave të fundit, Moska më parë ka mohuar akuzat evropiane për një fushatë sabotimi ose hibride nga Rusia. /Reporteri.net/