Një person ka humbur jetën dhe tre të tjerë rezultojnë të zhdukur pas përmbysjes së një varke pranë ishullit Alkatraz, në Gjirin e San Franciskos.

Ngjarja ndodhi të martën, 15 korrik, rreth 600 metra larg ishullit, ku një varkë me tre kate, me 20 persona në bord, u përmbys në ujëra të trazuara. Sipas autoriteteve, pasagjerët ishin kryesisht familjarë dhe po merrnin pjesë në një ceremoni përkujtimore.

Departamenti i Zjarrfikësve të San Franciskos njoftoi se mori një alarm për një mjet lundrues në vështirësi rreth orës 15:37 me kohën lokale. Një ekip shpëtimi që mbërriti i pari në vendngjarje gjeti një person në ujë në gjendje të rëndë dhe nisi menjëherë reanimimin, por ai u shpall i vdekur pasi u nxor në breg.

Tre persona të tjerë u plagosën dhe u dërguan në spital, ku ndodhen në gjendje të qëndrueshme. Ndërkohë, 13 pasagjerë të tjerë arritën të dilnin nga uji pa dëmtime.

Autoritetet amerikane kanë vijuar operacionin e kërkim-shpëtimit për gjetjen e tre personave të zhdukur. Në aksion janë angazhuar Departamenti i Zjarrfikësve të San Franciskos dhe Roja Bregdetare e Shteteve të Bashkuara.

Sipas dëshmitarëve, deti ishte i trazuar dhe varka kishte nisur të merrte ujë përpara se të përmbysej. Fillimisht ishte raportuar për një zjarr në mjetin lundrues, por ekipet e emergjencës nuk gjetën shenja zjarri kur mbërritën në vendngjarje.

Një prej personave që ndihmoi në shpëtim, punëtori i portit Justin Marceline, e përshkroi situatën si “kaos të plotë”, duke thënë se shumë prej personave të nxjerrë nga uji ishin të rraskapitur ose në gjendje paniku.