Është e paqartë nëse Serbia do të nënshkruajë deklaratën e përbashkët nga Samiti i BE- Ballkani Perëndimor, sepse ajo i angazhon shtetet për vendosjen e sanksioneve ndaj Rusisë, raporton gazeta serbe Danas.

Vetë shkuarja e Vuçiqit në këtë samit nuk ishte e sigurt, transmeton Reporteri.net.

Presidenti i Serbisë fillimisht tha se nuk do të shkojë për shkak të, siç tha ai, reagimit të papërshtatshëm të Bashkimit Evropian për emërimin e Nenad Rashiqit në postin e ministrit në Qeverinë e Kosovës nga kryeministri Kurti, e më pas dje konfirmoi pjesëmarrjen.

Sot Tirana do të jetë vendi i takimit të liderëve të BE-së dhe liderëve të Ballkanit Perëndimor dhe kjo është hera e parë që ky samit do të mbahet në një nga vendet e rajonit.

Vetë Vuçiq tha se pret që në Samit fillimisht të diskutohet vendosja e sanksioneve kundër Rusisë.

Pasojat e agresionit rus kundër Ukrainës, forcimi i sigurisë dhe ndërtimi i qëndrueshmërisë ndaj ndërhyrjeve të huaja në rajon, sfidat e emigrimit dhe lufta kundër terrorizmit dhe krimit të organizuar do të jenë disa nga temat kryesore që do të diskutohen sot sipas raportimeve.