Ndeshja e dytë e Francës në grupet e Kupës së Botës kundër Irakut rrezikon të vonohet ose të pezullohet për shkak të kushteve të pafavorshme atmosferike.
Skuadra e Didier Deschampsit e nisi në mënyrë të shkëlqyer aventurën në Grupin I me një fitore 3-1 ndaj Irakut, falë dopietës së Kylian Mbappés, i cili u bë golashënuesi më i mirë në historinë e kombëtares franceze, si dhe një goli nga Bradley Barcola.
Ndeshja u zhvillua në stadiumin ikonik “MetLife Stadium”, i cili do të presë edhe finalen e turneut.
Që nga ajo ndeshje e së martës së kaluar (16 qershor), “Les Bleus” janë përgatitur për përballjen me Irakun, i cili e nisi turneun me një humbje 4-1 ndaj Norvegjisë.
Takimi pritet të luhet në stadiumin “Philadelphia Stadium” (i njohur më parë si “Gillette Stadium”), por mund të shtyhet ose pezullohet për shkak të frikës nga stuhitë që mund të godasin zonën.
Raportohet se zyrtarët e FIFA-s po përgatiten të zbatojnë protokollet zyrtare në rast se ndodhin stuhi.
Rregulloret e FIFA-s, të bazuara në kërkesat e autoriteteve lokale të përcaktuara nga National Oceanic and Atmospheric Administration, thonë se një ndeshje duhet të ndërpritet ose të shtyhet nëse rrufeja bie brenda një rrezeje prej tetë miljesh nga stadiumi, ndërsa tifozët duhet të largohen nga vendet e tyre.
Të gjithë lojtarët duhet të largohen nga fusha dhe të strehohen në një vend të sigurt, përpara se t’u lejohet një nxehje e shkurtër para rifillimit të ndeshjes, sapo të marrin lejen për t’u rikthyer në fushë.
Ndeshja mund të rifillojë vetëm pasi të kenë kaluar 30 minuta pa asnjë goditje rrufeje.
Udhëzimet zyrtare të NOAA-s përcaktojnë se aktivitetet duhet të ndalen kur “shihni rrufe”, “dëgjoni bubullima” ose “qielli duket kërcënues”.
Nuk ka asgjë që sugjeron se ekziston një afat i caktuar pas të cilit një ndeshje shpallet përfundimisht e braktisur, pasi FIFA vendos rast pas rasti.
Gjithashtu, nuk është konfirmuar asnjë kohë maksimale që lojtarët duhet të presin.
Atlanta, Bostoni, Dallasi, Houstoni, Kansas City, Miami dhe New Jersey janë qytetet pritëse më të ekspozuara ndaj stuhive elektrike, ndërsa edhe Mexico City dhe Monterrey përjetojnë rregullisht kushte të ngjashme.
Megjithatë, moti i tillë zakonisht nuk përbën problem në Filadelfia.
Nëse një ndeshje nuk mund të përfundohet, ajo zakonisht do të rifillonte nga minuta në të cilën u ndërpre, në datën e ricaktuar.
Duke folur për “NBC10”, Lauren Lambrugo, Drejtoreshë Operative e organizatës Philadelphia Soccer 2026, shpjegoi protokollin që do të ndiqet në rast të goditjeve të rrufeve.
“Ata do të fillojnë evakuimin e stadiumit drejt korridoreve kryesore dhe do të kërkojnë strehim emergjent”, tha ajo.
“Pastaj duhet të kalojnë 30 minuta përpara se të rikthejnë të gjithë në fushë.”
Kur u pyet nëse ndeshja mund të shtyhet, ajo u përgjigj: “Do të sigurohen që ndeshja të transmetohet dhe të luhet nesër.”/
