Kryeministri izraelit Benjamin Netanyahu tha të enjten se raportet e mediave që sugjerojnë se mund të ketë një armëpushim të menjëhershëm në Liban ishin “të pasakta” dhe se i ka thënë ushtrisë izraelite të vazhdojë luftën “me forcë të plotë”, raporton “CNN”, përcjell Gazeta Online Reporteri.net

Netanyahu nuk ka përgjigjur ndaj një propozimi për armëpushim të bërë nga Shtetet e Bashkuara dhe Franca, thuhet në një deklaratë nga zyra e tij.

“Njoftimi për një armëpushim është i pavërtetë. Ky është një propozim amerikan-francez, ndaj të cilit kryeministri nuk ka dhënë asnjë përgjigje,” thuhet në deklaratë.

“Lajmi për një direktivë të supozuar për të moderuar luftën në veri është gjithashtu e kundërta e së vërtetës. Kryeministri e ka urdhëruar (Forcën Mbrojtëse të Izraelit) të vazhdojë luftën me forcë të plotë, sipas planeve që i janë paraqitur.”

Ministri i Jashtëm izraelit Israel Katz tha të enjten se “nuk do të ketë armëpushim në veri” dhe Izraeli do të vazhdojë të luftojë Hezbollah “me të gjitha fuqitë tona deri në fitoren dhe kthimin e sigurt të banorëve të veriut në shtëpitë e tyre.”

Një zyrtar izraelit i tha CNN-it më herët se bisedimet për një armëpushim të përkohshëm me Hezbollah janë një motiv kryesor për udhëtimin e Netanyahu në Nju Jork për Asamblenë e Përgjithshme të Kombeve të Bashkuara.