Donika Gërvalla, ministre e Punëve të Jashtme dhe Diasporës, ka folur në lidhje me dialogun në mes Kosovës dhe Serbisë.

Gërvalla ka pasur kritika të ashpra ndaj vetë lehtësuesit Miroslav Lajçak, i dërguar i posaçëm i BE-së për dialogun mes Kosovës dhe Serbisë.

Gërvalla e ka akuzuar Lajçakun se e ka dërguar në dështim dialogun dhe se nuk ka pasur një strategji të mirëfilltë.

“Jo vetëm me strategji të gabuar, por me mungesë totale të strategjisë së dialogut, e ka çuar këtë dialog deri në këtë moment në dështim. Unë konsideroj që ai nuk ka pasur një strategji të mirëfilltë, e cila do mund të kishte çuar në sukses, nuk ka pasur. Shumë shpesh ka qenë i njëanshëm dhe ia ka mbajtur anën Serbisë dhe shumë shpesh propozimet që i kanë bërë kanë qenë të destinuara të dështojnë, sepse nuk i kanë respektuar realitet”, tha Gërvalla në kanal 10.

Ka qenë edhe vet kryeministri i Kosovës, Albin Kurti, ai që disa herë ka akuzuar ndërmjetësin evropian të dialogut për normalizimin e raporteve me Serbinë, se është “pozicionuar” kundër Kosovës.

Kujtojmë se kryenegociatori i Kosovës, Besnik Bislimi dhe ai i Serbisë, Petar Petkoviq, u takuan të enjten në Bruksel me ndërmjetësimin e të dërguarit evropian për bisedimet ndërmjet Prishtinës e Beogradit, Miroslav Lajçak, në kuadër të përpjekjeve për të filluar zbatimin e marrëveshjes për normalizimin e marrëdhënieve ndërmjet dy vendeve.

Për dallim nga organizimet e muajve të fundit, kësaj radhe u zhvillua një takim trepalësh, ndonëse sërish pa ndonjë përparim.

Kryenegociatori i Kosovës, Besnik Bislimi, tha se takimi mes tij dhe homologut të vet serb, Petar Petkoviq, nën ndërmjetësimin e të dërguarit të Bashkimit Evropian, përfundoi pa “asnjë rezultat në temat e rëndësishme”.

Bislimi ka akuzuar Serbinë se po insiston në implementim të pjesshëm të marrëveshjeve. E ka cilësuar këtë qëndrim si joserioz.

Edhe një rund i pasuksesshëm në takimet ndërmjet kryenegociatorëve të Kosovës e Serbisë, palët akuzojnë njëra-tjetrën