Kryetari i Komunës së Suharekës, Bali Muharremaj, ka kërkuar veprim urgjent nga Kuvendi i Kosovës, pasi kësaj komune i janë bllokuar xhirollogaritë, shkruan Reporteri.net.

Bllokimi i xhirollogarisë, Muharremaj ka thënë se erdhi si pasojë e kontratës kolektive. Ai ka thënë se kjo situatë do të paraqitet edhe në komunat tjera nëse nuk ndërmerren masa.

“Sot zyrtarisht jemi njoftuar nga institucionet e nivelit qendror, që na kanë bllokuar qasjet për të gjithë zyrtarët financiarë për ne si Komunë e Suharekës, deri sa të procedohen vendimet gjyqësore/përmbarimore…Kjo situatë siç është paralajmëruar edhe nga Asociacioni i Komunave, do të vazhdoj edhe në komunat tjera, nëse nuk merren masa të menjëhershme, si pasojë e kontratës kolektive”, ka shkruar Muharremaj.

Ai ka thënë se komunat s’duhet të mbesin peng i një marrëveshje, që sipas tij duhet të zbatohet nga Qeveria.

“Ne kemi obligime financiare për projektet që i kemi planifikuar, dhe nuk duhet të mbesim peng e një marrëveshje të cilën duhet t’a zbatoj Qeveria e Kosovës, e ku pasojat tashmë po i bartim ne si komuna. Për këtë situatë,  duhet të veproj urgjentisht edhe Kuvendi i Republikës së Kosovës ngase situata e vështirë financiare do të rëndohet edhe më shumë”, ka shkruar Muharremaj.