Rebelët sirianë pretenduan herët në mëngjesin e 8 dhjetorit se kanë marrë nën kontroll kryeqytetin, Damaskun, pas një ofensive të shpejtë të ditëve të fundit që përparoi shpejt nëpër vend.

Damasku është “tani i lirë nga Assadi,” thanë rebelët në një deklaratë në rrjetet sociale.

Siç raporton “The Guardian”, në sheshin qendror të kryeqytetit, njerëzit u hipën mbi tanke dhe po brohorisnin, ndërsa shkelnin një statujë të rrëzuar të babait të Asadit, Hafezit.

Koalicioni rebel sirian tha se po vazhdon punën për të përfunduar transferimin e pushtetit në Siri te një organ qeverisës kalimtar me kompetenca të plota ekzekutive.

Kryeministri sirian Mohammed Ghazi Jalali tha se qeveria është e gatshme t’i “zgjatë dorën” opozitës dhe t’ia dorëzojë funksionet e saj një qeverie kalimtare.

“Unë jam në shtëpinë time dhe nuk jam larguar dhe kjo për shkak të përkatësisë sime në këtë vend”, tha Jalili.

Assad, i cili ka drejtuar vendin për gati 25 vjet, thuhet se është larguar nga Damasku me avion për një destinacion të panjohur.

/Reporteri.net/