Franca po i ofron  ndihmë të inteligjencës Ukrainës, tha të enjten ministri francez i mbrojtjes Sébastien Lecornu, me Parisin që ndërhyn për të ndihmuar dhe mbushur boshllëkun e lënë pasi SHBA pezulloi shkëmbimin e informacioneve  inteligjencës me Kievin.

Duke folur për radion France Inter, ai tha gjithashtu se presidenti Macron i kërkoi atij të përshpejtonte paketat e ndihmës franceze “për të kompensuar” ndihmën e pezulluar të SHBA-së.

Drejtori i CIA’s, John Ratclife, ka konfirmuar të mërkurën se Shtetet e Bashkuara të Amerikës e kanë pezulluar ndihmën e inteligjencës për Ukrainën ashtu sikurse edhe dërgimin e armëve, pas përplasjes të së premtes mes Presidentit Donald Trump dhe Presidentit të Ukrainës, Volodymyr Zelensky.

“Trump kishte pyetje serioze nëse Presidenti Zelensky ishte i përkushtuar ndaj procesit të paqes dhe tha le t’i ndalim”, ka deklaruar Ratcliffe për Fox Business.

Ratcliffe shpreson se pezullimi do të hiqet së shpejti, teksa theksoi angazhimin e tij për të punuar me Ukrainën drejt arritjes së paqes, pas letrës nga presidenti ukrainas drejtuar Trump./Reporteri.net/