Lidhja Demokratike e Kosovës ka reaguar pasi Lëvizja Vetëvendosje ka kërkuar nga Paneli për Ankesa dhe Parashtresa që të anulojë rezultatet e votimit me postë dhe që të urdhërojë Komisionin Qendror Zgjedhore që të përsërisë votimin.

Visar Azemi  dhe Jehona Lushaku-Sadriu, kanë reaguar pasi VV është ankuar në PZAP duke thënë se partia e Albin Kurtit nuk po ka numra për ta bërë qeverinë dhe po dëshiron me dhunë t’i bëjë 51 deputetë, shkruan Reporteri.net.

Azemi përmes një postimi në Facebook ka shkruar se partia që drejton Kurti po dëshiron të manipulojë procesin zgjedhor, meqë duan t’i marrin 51 deputetë me dhunë.

Ai i ka bërë thirrje edhe komunitetit ndërkombëtar për të ndërhyrë dhe për ta mbrojtur procesin zgjedhor.

“Po duan manipulim të procesit zgjedhor! Po duan marrjen e 51 mandateve me dhunë dhe manipulim! Lëvizja Vetëvendosje po tenton të ndikojë dhe të manipulojë procesin zgjedhor duke kërkuar nga KQZ të anulojë votat me postë dhe të organizojë zgjedhje të reja vetëm për diasporën. Po e fshehin manipulimin e tyre me vota ne ambasada e konsulata. Paramendoni, jane gati 2000 vota qe jane printuar me defekt të njejtë dhe për çudi të gjitha këto janë vota për Levizjen Vetevendosje! Ky eshte manipulimi! Ky eshte keqperdorimi! Ky është një sulm i drejtpërdrejtë ndaj demokracisë dhe vullnetit të qytetarëve. LDK nuk e pranon! LDK nuk e toleron!”

“Nuk do ta ndalni rritjen e LDK-së as në Kosovë e as në diasporë. Ftojmë komunitetin ndërkombëtar që të ndërhyjë për të mbrojtur procesin zgjedhor dhe votën e qytetarëve të vendit dhe të sigurojë që zgjedhjet në Kosovë të jenë të lira, të drejta dhe demokratike. Demokracia nuk mund të jetë peng i një partie të vetme!”, ka shkruar Azemi, shkruan Reporteri.net.

Kurse, Jehona Lushaku-Sadriu ka thënë se LDK është pengesë për VV-në, prandaj kjo e fundit është ankuar.

“Partia në pushtet paska nisë ankesa për procesin zgjedhor, me qëllim të vazhgitjes së certifikimit.
Arësyeja është e thjeshtë: S’po ka numra, ashtu siq donte. E, pra mendësia absolutiste e ‘500K zemrave’ nuk ja doli, e tash turren me kontestu procesin e zgjedhjeve”.

“Është e dukshme që rritja e LDK-së është pengesa kryesore për ta. E po, rritja e LDK-së është vet puna e pandalshme e shumë aktivistëve e bashkatdhetarëve tanë që s’u ndalën asnjëherë. 💙 “, ka shkruar Lushaku-Sadriu.

Në ankesën e dërguar në PZAP, Vetëvendosje po pretendon që në fletëvotimet e ardhura me postë ka pasë manipulime dhe se është cenuar e drejta e votës. /Reporteri.net/.