Presidentja e Republikës së Kosovës, Vjosa Osmani ka pritur sot në takim Sekretarin e Përgjithshëm të NATO-s, Mark Rutte, shkruan Gazeta Online Reporteri.net.

E para e shtetit, për takimin me Shefin e NATO-s ka thënë se bashkë me të riafirmuan partneritetin me “Aleancën më të fuqishme të sigurisë në botë”.

“Kosova në NATO nuk është vetëm përcaktim strategjik – por domosdoshmëri për paqen. Në takim me Sekretarin e Përgjithshëm të NATO-s, Mark Rutte, riafirmuam partneritetin tonë me Aleancën më të fuqishme të sigurisë në botë”, ka shkruar Osmani.

Presidentja Osmani ka ritheksuar se Synimi i Kosovës është i qartë, anëtarësimi në NATO.

“Si vend që ka tejkaluar objektivin e NATO-s për investime në mbrojtje prej 2% të GDP-së dhe po ndërton një forcë moderne të sigurisë, në përputhje me standardet e Aleancës, synimi ynë është i qartë: anëtarësimi në NATO si një kontribuues i palëkundur për sigurinë rajonale dhe globale”, shkruan Osmani në Facebook.

/Reporteri.net/