Kandidati për kryeministër nga PDK, Bedri Hamza ka konfirmuar se ka pasur diskutime me partitë e tjera opozitare për formimin e Qeverisë së re. Por Hamza ka thënë se me disa parti nuk kanë arritur deri në atë fazë sa të diskutojnë se si do të duket formula e Qeverisë së re të Kosovës.

Ai këtu përmendi Lidhjen Demokratike të Kosovës. Hamza tha se me LDK-në nuk kanë arritur ende të kalojnë në fazën ku do të diskutonin për formulën e Qeverisë së re.

Hamza u pyet se a është e gatshme që LDK-së, t’ia japë postin e kryeministrit në rast se ky paraqitet si kusht nga kjo parti. Ai në një konferencë për media e bëri të qartë se PDK është partia e dytë dhe renditja dihet, shkruan gazeta online Reporteri.net.

“PDK e ka bërë të qartë, unë e vlerësoj shumë votën e qytetarit…Megjithatë renditja është e qartë, PDK është partia e dytë me 24 deputetë dhe asnjëherë në tavolinë nuk kemi pasë ende temë se si ka me u dokë qeveria e re. Radha dihet dhe mbi bazën e kësaj do të diskutojmë.

Me disa parti politike thuajse jemi në rregull, ku flasim edhe për formulën e komponimit të Qeverisë, ndërsa sa u përket disa të tjerave, e thashë edhe me LDK-në, ende nuk jemi në atë fazë ku do ta diskutojmë formulën e Qeverisë”, tha Hamza në një konferencë për media.

Hamza tha se nuk i preferon vijat e kuqe dhe konfirmoi se nuk ka pasur asnjë komunikim zyrtar me VV-në për formimin e Qeverisë së re.

“Me VV-në nuk kemi pasur deri më tani asnjë komunikim zyrtar. Nuk kemi pranu ftesë dhe as nuk kemi bë ftesë sepse radha dihet. Për mua është e preferueshme krijimi i Qeverisë me LDK-në dhe partitë e tjera”, tha Hamza në një konferencë për media./Reporteri.net/